Prezident Qasym-Jomart Toqaevtyń Qytai Halyq Respýblikasyna ekikúndik memlekettik sapary QKP OK Saiasi biýrosynyń múshesi, QKP Syrtqy ister jónindegi basqarýshy top Kantseliariiasynyń bastyǵy Ian Tszechimen kezdesýden bastaldy, dep habarlaidy "Ult aqparat" Aqordaǵa silteme jasap.
Kezdesý barysynda Memleket basshysy Ian Tszechi myrzany burynnan biletinin, onyń QKP syrtqy ister ministri laýazymyndaǵy tabysty qyzmetimen buǵan deiin de jiti tanys ekenin atap ótti. Prezident bul sapardyń Qazaqstan úshin óte mańyzdy ekenin de aitty.
– Biz Qytaidy kórshiles ári dostyq qarym-qatynastaǵy memleket dep esepteimiz. Sondai-aq, álemdegi ekonomikasy damyǵan ekinshi el ekenin de negizge alamyz. Qazaqstan bul saparǵa úlken mán beredi. Biz Qazaqstannyń Aziiadaǵy is-qimyl jáne ózara senim sharalary jónindegi keńes pen halyqaralyq arenadaǵy basqa da bastamalaryn qoldaǵany úshin Qytai memleketine rizashylyq bildiremiz. Ekonomikalyq yntymaqtastyqqa keler bolsaq, onyń strategiialyq sipaty bar. Tuńǵysh Prezidentimiz Nursultan Nazarbaev pen Tóraǵa Si Tszinpin qol jetkizgen ýaǵdalastyqtar odan ári dami beredi, – dedi Memleket basshysy.
Ian Tszechi Qasym-Jomart Toqaevty biylǵy maýsymda Qazaqstan Prezidenti laýazymyna sailanýymen quttyqtady. Onyń aitýynsha, sailaýdaǵy jeńis – Qazaqstan halqynyń joǵary seniminiń kórsetkishi. Ian Tszechi Qazaqstan Prezidentiniń bul sapary eki el arasyndaǵy jan-jaqty strategiialyq seriktestikke tyń serpin beretinin málim etti.
