Qazaqstan Prezidenti Bashqurtstan basshysy Radii Habirovpen kezdesý ótkizdi, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev pen Radii Habirov Qazaqstan men Bashqurtstannyń saýda-ekonomikalyq, ónerkásip, investitsiia jáne mádeni-gýmanitarlyq salalardaǵy yntymaqtastyǵyn odan ári nyǵaitý máselelerin talqylady.
Kezdesý barysynda Memleket basshysy Qazaqstan men Resei Federatsiiasy arasyndaǵy strategiialyq seriktestikte Bashqurtstan Respýblikasynyń erekshe oryn alatynyn atap ótti. Prezident eki el arasyndaǵy saýda-ekonomikalyq qatynastardyń qarqyndy damyp kele jatqanyna nazar aýdardy.
– Biz Qazaqstan men Bashqurtstan arasyndaǵy iskerlik yntymaqtastyqqa qatysty naqty jobalar jasaýǵa jáne damytýǵa múddelimiz. Sondyqtan sizderdiń kompaniialaryńyzdyń jetekshilerin Qazaqstanǵa shaqyramyn. Biz barlyq jaǵdaidy jasaimyz. Buǵan qyzyǵýshylyq tanytyp otyrmyz. Eger sizderdiń tarapyńyzdan indýstriialyq áleýeti eskerilgen óte mańyzdy birlesken jobalar usynylsa, jumysymyz jemisti bolady dep oilaimyn, – dedi Prezident.
Memleket basshysynyń aitýynsha, Bashqurtstan dástúrli túrde Qazaqstan men Reseidiń aimaqaralyq yntymaqtastyǵyn nyǵaitýǵa eleýli úles qosýda. Onyń pikirinshe, túrli baǵyttar boiynsha ózara yqpaldastyqty keńeitýge áleýet jetkilikti jáne Qazaqstan ony tolyqqandy iske asyrýǵa nietti.
Óz kezeginde Radii Habirov kezdesýge múmkindik bergeni úshin Qasym-Jomart Toqaevqa alǵys bildirip, Qazaqstanmen aradaǵy yntymaqtastyqty damytýdyń strategiialyq mańyzy bar ekenin atap ótti.
– Bashqurtstan Qazaqstannyń biznesimen jumysty odan ári jalǵastyrýǵa asa múddeli. Biz úshin bul óte mańyzdy. Osy ýaqyt aralyǵynda qol qýsyryp otyrǵanymyz joq. Meniń Qazaqstanǵa saparym barysynda birqatar kelisimder jasalyp, ýaǵdalastyqtarǵa qol jetkizildi jáne olardyń bári júzege asyryldy. Eń aldymen, ózara qarym-qatynas infraqurylymyn jolǵa qoidyq, – dedi Radii Habirov.
