Qasym-Jomart Toqaev Eýraziialyq úkimetaralyq keńestiń otyrysyna qatysý úshin Qazaqstanǵa kelgen Armeniianyń Premer-ministri Nikol Pashinianmen kelissóz júrgizdi.
Bul týraly Aqordanyń resmi saity habarlady.
Kezdesý barysynda olar saýda-ekonomikalyq bailanystardy, sonyń ishinde Eýraziialyq ekonomikalyq odaq aiasyndaǵy yntymaqtastyqty nyǵaitýǵa basa nazar aýdara otyryp, Qazaqstan men Armeniia arasyndaǵy qatynastardyń damý perspektivalaryn qarastyrdy. Taraptar halyqaralyq uiymdar aiasyndaǵy ózara is-qimyldar men Ýkraina tóńiregindegi jaǵdaidy talqylady.
Memleket basshysy Armeniia Premer-ministrine iltipat bildirip, ekijaqty yntymaqtastyqtyń qarqyndy damyp kele jatqanyn atap ótti.
– Biyl bizdiń diplomatiialyq qatynastarymyzdyń ornaǵanyna 30 jyl. Bul – óte mańyzdy data. Eki el arasynda joǵary deńgeilerdegi ashyq saiasi dialog jolǵa qoiylǵan. Parlamenttik, mádeni-gýmanitarlyq bailanystarymyz damyp keledi, – dedi Prezident.
Memleket basshysy Armeniianyń Ujymdyq qaýipsizdik týraly shart uiymyndaǵy tóraǵalyǵyn joǵary baǵalap, qańtardaǵy qaiǵyly oqiǵalar kezinde UQShU-nyń bitimgerlik kontingentin Qazaqstanǵa jiberý týraly sheshimdi qoldaǵany úshin Nikol Pashinianǵa rizashylyǵyn bildirdi.
Óz kezeginde Armeniia Úkimetiniń basshysy qonaqjailyq kórsetkeni jáne Eýraziialyq úkimetaralyq keńes otyrysynyń joǵary deńgeide uiymdastyrylǵany úshin alǵys aitty.
– Qazaqstanmen aradaǵy qarym-qatynastarymyzdyń tabysty damyp kele jatqanyna qýanyshtymyn. Qazir Eýraziialyq ekonomikalyq odaq formatynda ekonomikalyq yntymaqtastyq pen Eýraziialyq ekonomikalyq keńistikti odan ári damytý máselelerin talqylap jatyrmyz, – dedi Nikol Pashinian.
Sondai-aq Premer-ministr Nikol Pashinian UQShU-nyń daǵdarysqa qarsy áreket etý tetikterin oń baǵalap, Armeniianyń uiymǵa tóraǵalyǵy aiasynda osy máselege basymdyq beriletinin atap ótti.
