Almatyda sýretshi Ásel Sabyrjanqyzy Qazaqstan Prezidenti Qasym-Jomart Toqaevtyń portretin erekshe tásilmen – sózder jazý arqyly saldy. Osydan keiin Memleket basshysy oǵan alǵys hat joldap, densaýlyq pen jetistik tilegen, dep habarlaidy QazAqparat agenttigi.
Sýretshi portretti QR Prezidentiniń aty-jónin qaitalap jazý arqyly salǵan.
«Mundai tehnika sýretshiler arasynda óte tanymal, simvol grafikasy dep atalady. Iaǵni áldebir zattardan ne elementterden portret salý. Osyǵan uqsas jumystarym bar: Dinmuhamed Qonaev, Kerei men Jánibek handar, Kenesary han portretteri. Biraq olardy «kishkentai adamdardan» saldym. Al munda basqasha tásil qoldanýdy jón kórdim – Prezidentti sózderden saldym. Osylaisha, Qasym-Jomart Kemelulyna qoldaý bildirgim keldi. Sózderden sýret salý – alǵashqy tájiribem», - deidi Ásel.
Ol óz jumysyn Instagram-ǵa salǵan. Video búgingi kúni 3 millionnan astam qaralym jinady. Bul sýretshi úshin – jańa rekord.
«Birer kún buryn Prezident Ákimshiliginen habarlasty, maǵan áldebir nárse bergisi keletinderin aitty. Keiin maǵan Memleket basshysynan konvert alyp keldi. Prezident meniń jumysymdy kórgen eken, oǵan bári unaǵan. Hatta: «Sen siiaqty talantty jastar kóp bolsa, elimizdiń keleshegi jarqyn bolady», - dep jazylǵan. Sondai-aq zor densaýlyq pen jemis tilegen. Shynymdy aitsam, Prezidenttiń ózinen mundai reaktsiia bolady dep kútpegen edim. Sheksiz qýanyshtymyn», - deidi sýretshi.
Onyń aitýynsha, Prezidenttiń portreti satylyp ketken. Qazir kartinanyń kopiiasyn jasap jatyr.
Áseldiń sózinshe, ol jumys barysyn kameraǵa jii túsiredi. Sebebi adamdar sondai videolardy qaraǵandy unatady. Sondai-aq ol qandaida bir tulǵany, tanymal adamdy salý ideiasy aiaq asty keletinin atap ótti. «Mysalǵa, Batyrhan Shúkenovtiń portreti bar. Ony Batyrdyń týǵan kúni qurmetine saldym. Gennadii Golovkinniń portretin onyń jekpe-jegi aldynda saldym. Dimash Qudaibergendi – onyń «Samaltaý» ánin estigennen keiin. Sondai-aq Baýyrjan Momyshulynyń jáne ózge tanymal tulǵalardyń beineleri salynǵan kartinalarym bar», - dedi ol.
