Qazaqstan Prezidenti Aqtaý qalasyndaǵy kásipkerlerge qyzmet kórsetý ortalyǵyna bardy, dep habarlaidy "Ult aqparat" Aqordaǵa silteme jasap.
Memleket basshysy Qasym-Jomart Toqaev Mańǵystaý oblysyna jumys sapary barysynda kásipkerlerge «bir tereze» qaǵidasy boiynsha qyzmet kórsetetin ortalyqtyń jumysymen tanysty. Ortalyq memlekettik satyp alý, býhgalterlik, salyq jáne statistikalyq esepter, kedendik rásimder, aqparattyq tehnologiialar boiynsha qyzmet kórsetedi. Sondai-aq, bizneske memlekettik qoldaý kórsetý jáne kásipkerlerge quqyqtyq kómek berý máseleleri jóninde tegin keńes beriledi.
Sonymen qatar, Prezidentke «Bastaý-Biznes» baǵdarlamasynyń júzege asyrylý barysy baiandaldy. «Atameken» Ulttyq kásipkerler palatasynyń jobalary: túie sharýashylyǵy, repetitorlik ortalyq, tipografiia, sulýlyq salony, stomatologiialyq kabinet, balabaqsha jáne basqa da bastamalar tanystyryldy.
