Qazaqstan Prezidenti Qasym-Jomart Toqaev 9 aida 112 796 shaqyrym jol júrdi. Bul týraly búgin Aqordada ótken brifingte QR Prezidentiniń baspasóz hatshysy Berik Ýáli aitty, dep habarlaidy QazAqparat.
Onyń atap ótýinshe, QR Prezidenti biylǵy 20 naýryzdan beri 45 Zańǵa, 226 Jarlyqqa, 68 Ókimge qol qoidy. Prezidenttiń qatysýymen ótken jiyndar boiynsha 49 hattama toltyrylǵan.
«Qazaqstan Prezidenti biylǵy 9 aida 112 796 shaqyrym jol júrdi. Oǵan 181 saǵat 36 minýt ýaqyt ketken. Qasym-Jomart Kemeluly 2 qyrkúiekte Qazaqstan Prezidenti retinde alǵash ret Qazaqstan halqyna arnalǵan Joldaýyn jariialady. Memleket basshysy zaman talabyna sai memleket bolý úshin azamattarymyz ben memleketimizdiń múddesine sáikes jańǵyrý úderisi birtindep júzege asatynyn atap ótti. Saiasi reformalardy «asyǵystyqqa salynbai», kezeń-kezeńimen, jan-jaqty oilastyryp oryndaý qajettigin aitty. Joldaýda elimizdiń saiasi júiesinde «Kúshti Prezident – yqpaldy Parlament – esep beretin Úkimet» formýlasy memleket turaqtylyǵynyń negizi sanalatynyna basa mán berildi. Sondai-aq, Qasym-Jomart Kemeluly azamattardyń ótinish-tilekterin jedel ári tiimdi qarastyratyn «Halyq únine qulaq asatyn memleket» tujyrymdamasyn iske asyrý bárimizge ortaq mindet ekenin belgilep berdi», - dedi Berik Ýáli.
Onyń aitýynsha, Memleket basshysynyń tapsyrmasymen QR Prezidenti Ákimshiliginde Ótinishterdi qaraýdy baqylaý bólimi jáne Prezidenttiń Virtýaldy qabyldaýy ashyldy. Jalpy bul bólimge 1 tamyzdan beri 15 669 ótinish tústi, onyń 4025-i virtýaldy qabyldaý arqyly kelgen. Kelip túsken ótinishterdiń bárine ýaqtyly ári tiisti jaýap berildi.
«Memleket basshysy naýryz aiynyń sońynda ákimder men ministrlerdiń bárine áleýmettik jelilerge tirkelýdi mindettedi. Bul Qasym-Jomart Kemelulynyń «Halyq únine qulaq asatyn memleket» tujyrymdamasynyń oryndalyp jatqanyn dáleldeidi», - dedi ol.
