Foto: Polisia.kz
Búgin, 23 maýsym – Qazaqstan politsiiasy kúni. Bul kúntizbedegi jai kún emes, Otan aldyndaǵy adal qyzmetti ómiriniń mánine ainaldyrǵan, halyqtyń tynyshtyǵy men qaýipsizdigin qamtamasyz etetin jandardyń erligi men janqiiarlyǵyna kórsetilgen qurmet kúni, dep habarlaidy Ult.kz.
Ishki ister ministrliginiń habarlaýynsha, táýelsizdik jyldary ishki ister organdarynyń 800-den astam qyzmetkeri qyzmettik boryshyn atqarý kezinde qaza tapqan. Shamamen 5 myń qyzmetker jaraqat aldy.
"Keshegi uly dala zańdaryn kúzetken batyrlar siiaqty, búgingi politseiler de ár azamattyń quqyǵy men qaýipsizdigin qamtamasyz etedi. Qoldaǵy qarý men saýyt-saiman ózgergenimen, mindet sol qalpynda – beibitshilik pen ádilettilikti qorǵaý. Politsiia — qazaq batyrlarynyń erlik dástúrin jalǵastyrýshy, qaýip-qaterge eń alǵash bolyp den qoiatyn qalqan", - delingen politsiia habarlamasynda.
Qazaqstan Respýblikasy politsiiasy kúnine orai Ishki ister ministri Erjan Sadenov Ishki ister organdarynyń qyzmetkerleri men ardagerlerine arnalǵan quttyqtaý jariialady.
Vedomstvo basshysy politsiia jumysynyń mańyzdylyǵyn atap ótip, onyń árdaiym ádildik, abyroi jáne erliktiń simvoly bolýy kerektigine nazar aýdardy. Ol áriptesterine tabandylyǵy, janqiiarlyǵy jáne antqa adaldyǵy úshin alǵys bildirip, al ardagerlerge jas urpaqty tárbieleýge qosqan úlesi men minsiz qyzmeti úshin erekshe rizashylyǵyn jetkizdi.
"Ishki ister organdaryndaǵy qyzmet joǵary kásibilikti, tózimdilikti jáne óz isine sheksiz adaldyqty talap etedi. Búgin de, buǵan deiingidei, sizder tabandylyq, janqiiarlyq pen antyna adaldyq tanytyp kelesizder. Sizderge zor densaýlyq, amandyq jáne jaqsylyq tileimin!" - dedi Ishki ister ministri.
Atalǵan mereke 2007 jyly belgilengen jáne jyl saiyn 23 maýsymda — 1992 jyly "Ishki ister organdary týraly" Zań qabyldanǵan kúni atalyp ótedi.
