Búgin OPEK+ birlesken monitoring komitetiniń otyrysy ótti, dep habarlaidy "Ult aqparat" QR Energetika ministrliginiń baspasóz qyzmetine silteme jasap.
Buǵan deiin OPEK+ qatysýshy elder arasynda 2020 jyldyń mamyr-shilde ailarynda munai óndirýdi táýligine 9,7 mln barrelge deiin ujymdyq qysqartý týraly kelisimge qol qoiylǵan edi.
«OPEK+ birlesken monitoring komiteti otyrysynda 2020 jyldyń maýsym aiynda memleketterdiń oryndaǵan mindetteri qorytyndylandy.
Qatysýshylar kelisimniń álemdik munai indýstriiasyna oń yqpal etkenin atap ótti.
Ár túrli sebeptermen óz mindetterin tolyq oryndai almaǵan birqatar elder munai óndirý kólemin qosymsha qysqartýǵa daiyn ekenderin aitty», delingen habarlamada.
Ministrliktiń málimdeýinshe, Qazaqstan óz kezeginde mindettemelerdi oryndaýǵa daiyn. «Buǵan deiin memleket ókilderi OPEK+ hatshylyǵyna mamyr aiynyń alǵashqy 12 kúninde elde salanyń inerttiligine bailanysty munai artyq óndirilgenin habarlaǵan bolatyn.
OPEK+ kelisiminiń talaptary boiynsha biyl tamyz aiynda munai óndirý kólemin ujymdyq qysqartýdy táýligine 9,7 mln barrelden 7,7 mln barrelge deiin azaitý qarastyrylǵan», delingen habarlamada.
