QR Densaýlyq saqtaý ministrliginiń ókilderi DDSU Eýropalyq óńirlik komitetiniń 70-sessiiasyna qatysýda, dep habarlaidy "Ult aqparat" QR Densaýlyq saqtaý ministrligniń Facebook paraqshasyna silteme jasap.
«Búgin DDSU Eýropalyq aimaqtyq biýrosynyń 70-sessiiasy bastaldy, COVID-19 pandemiiasyna bailanysty biyl jiyn alǵash ret virtýaldy formatta ótedi. Eýropa aimaǵyndaǵy DDSU-ǵa múshe 53 memlekettiń densaýlyq saqtaý ministrleri men ózge de joǵary laýazymdy azamattar, sondai-aq seriktes uiymdar men azamattyq qoǵam ókilderi eki kún boiy densaýlyq saqtaý salasyndaǵy túrli máseleni talqylaidy»-delingen habarlamada.
Qysqartylǵan sessiianyń kún tártibindegi negizgi taqyryptardyń biri: aimaqtaǵy jáne álemdegi COVID-19 pandemiiasyna qarsy is-qimyl men tájiribe, 2020-2025 jyldarǵa arnalǵan densaýlyq saqtaýdy jaqsartýǵa baǵyttalǵan jańa Eýropalyq baǵdarlama.
Sessiianyń alǵashqy kúngi baǵdarlamasynda Daniianyń Uly mártebeli kronhanshaiymy sóz sóileidi dep josparlanýda. Budan keiin Eýropalyq óńirlik komiteti jiyrma jetinshi shaqyrylymnyń Turaqty komitetiniń esebi tyńdalyp, tiisti qarardyń jobasy qabyldanady.
Sondai-aq, DDSU bas direktory doktor Tedros Adhanom Gebreiesýs aimaqtyq komitet sessiiasynyń delegattary aldynda sóz sóileidi. Ol álemdegi jaǵdaiǵa, sonyń ishinde COVID-19 pandemiiasymen kúresý tájiribesine sholý jasaidy.
Sessiia otyrystary aǵylshyn jáne orys tilderinde kórsetiledi. Sonymen qatar, halyqaralyq jiyn DDSU Eýropalyq aimaqtyq biýrosynyń arnalary arqyly jariialanady
DDSU Eýropalyq óńirlik biýrosynyń sessiiasy Nur-Sultan qalasynyń ýaqyty boiynsha saǵat 13:00-de tikelei efirde bastalady. Ony myna siltemeden kórýge bolady.
