Elimizde qańtar-shilde ailarynda 51,5 mln tonna munai jáne kondensat óndirildi. Bul týraly Úkimet otyrysynda QR Energetika ministri Nurlan Noǵaev aitty, dep habarlaidy "Ult aqparat".
«2020 jyldyń qańtar-shilde ailarynyń qorytyndysy boiynsha munai jáne kondensat óndirý kólemi 51,5 mln tonnany qurap, 2019 jyldyń sáikes kezeńimen salystyrǵanda 1,4 paiyzǵa tómen boldy. Óndiris kólemi josparynyń oryndalmaý sebebi - koronavirýstyń taralýyn boldyrmaý maqsatynda kóptegen elderde karantin engizilýi», - dedi ministr.
Onyń túsindirýinshe, koronavirýs indetine bailanysty álemdik ekonomikalyq belsendilik tómendep munai jáne munai ónimderiniń jahandyq usynysy tez artyp ketken.
«Balanstyń buzylýyna munai men munai ónimderiniń álemdik jinaqtarynyń qarqyndy ósýi de eleýli áser etti. Osyndai qajettilikti qamtamasyz etýge munai qoimalary kóleminiń jetispeýshiligi óndiristi toqtatý qaýpin týyndatty. Munai qoimalarynyń tolyp ketýin boldyrmaý maqsatynda óndirýdi qysqartý jónindegi sharalar qabyldandy. Munai eksporty 42 mln tonnany qurady. Bul 2019 jyldyń sáikes kezeńimen salystyrǵanda - 104 paiyz», - dedi Nurlan Noǵaev.
