Qazaqstan munai servistik kompaniialar odaǵynyń tóraǵasy Rashit Jaqsylyqov jumyssyzdaqqa jol bermeýdiń birneshe amalyn atady, dep habarlaidy QazAqparat.
«Munai-gaz óndirisine qyzmet kórsetý salasynda 2 myńnan astam kásiporyn bar. Onda 200 myńǵa jýyq qazaqstandyq eńbek etedi. Bul – óte úlken ekonomikalyq sala. Munai baǵasy tómendegen saiyn munai óndirýshi kompaniialar shyǵyndy únemdeý sharalaryn arttyrary sózsiz. Bul jaǵdaida eń aýyr soqqy munaiǵa qyzmet kórsetý salasyna tieri aidan anyq. Obektivti túrde qaraityn bolsaq jumys ornyn qysqartý jáne qarjylai únemdeý – óndirýshi kompaniialar men olardyń bas merdigerlerin ainalyp ótedi. Ol tikelei qyzmet kórsetý kompaniialarynda kezdesedi. Mysaly TShO kompaniiasy júrgizip jatqan «Bolashaq-Damý» jobasyna qatysyp, jaqyn arada óz jumysyn aiaqtaityn qazaqstandyq kompaniialardyń 5 myńǵa jýyq jumysshysy jazda jumyssyz qalý qaýpi bar. Olardy biz qaida jiberemiz?» - deidi Rashit Jaqsylyqov OKQ-da ótken baspasóz máslihatynda.
Qazaqstan munai servistik kompaniialar odaǵynyń tóraǵasy mundai mysal elde kóp ekenin aita otyryp, jumyssyzdyqqa jol bermeý boiynsha birqatar shara qabyldaýdy usyndy.
«Birinshiden osy kezge deiin qol qoiylǵan kelisimsharttardyń qarjylai qunyn tómendetpeý kerek. 2015 jyly týra osyndai jaǵdai bolǵan kezde operatorlar qundy 20 paiyzǵa tómendetip, birtalai kompaniia bankrotqa ushyrady. Ekinshiden buǵan qosa kelisimsharttardyń bári de teńgemen bekitilgen. Qarjy naryǵynda da júrip jatqan infliatsiialyq jaǵdaidy ózderińiz bilesizder. Kelisimsharttyń qunsyzdanýyna ákelýi múmkin. Sondyqtan infliatsiianyń ózgerýine bailanysty kelisimshartty ózektendirip otyrý qajet. Úshinshiden munai óndirýshi kompaniialar mundai jaǵdaida salyqtyq jeńildikter alady. Bul jeńildikterdi investitsiialyq mindettemelerin toqtatpaityn operatorlarǵa ǵana berý kerek. Olar qurylys jáne burǵylaý jumystaryn toqtatpaýǵa mindetteme alýy tiis», - dedi ol.
Rashit Jaqsylyqov tórtinshiden, elimizde jańa jobalardy iske qosý jumysy jedeldetilýi tiis ekenin aitady. Mysaly, Qarashyǵanaq ken ornynyń keńeiýýi 4 mlrd dollarlyq joba. Odan bólek Qazaqstandaǵy gaz-hiiia jobalaryn tezirek iske qosqan abzal.
«Besinshiden otandyq kompaniialar óziniń qyzmetin eksporttaýǵa kómektesý kerek. Mysaly Reseidiń ártúrli jobalarynda qazaqstandyq 2 myńnan astam azamat qyzmet kórsetip júr. Altynshydan 100 mln dollarǵa deiingi kelisimsharttardyń bárin de Qazaqstan kompaniialaryna berý kerek. Qazaqstan kompaniialary ósip-jetildi. Qazir olar ol mindettemeni atqara alady. Al odan joǵary somadaǵy kelisimsharttardy odan joǵary kásiporyndarǵa berý kerek. Bizdiń oiymyzsha osyndai naqty sharalardy qolǵa alsaq, ekonomikamyzdyń álsireýine jol bermeimiz», - dep túidi Rashit Jaqsylyqov.
