Almatyda «Qazaqstan muǵalimi 2020» ulttyq syilyǵynyń 10 laýreaty anyqtaldy. Bas júldeni – Nur-Sultan qalasyndaǵy «NZM» filialynyń himiia páni muǵalimi Dinara Beisembaeva jeńip aldy, dep habarlaidy QazAqparat.
Dinara Beisembaeva — himiia pániniń muǵalimi, ekologiia magistri, «Rasshirennoe Esse» jetekshisi, ǵylymi maqalalar men basylymdardyń avtory, daryndy balalardyń bilim alý qajettilikterine arnalǵan baǵdarlamanyń jasaýshylarynyń biri. Onyń oqýshylary ǵylymi saiystardyń jáne halyqaralyq olimpiadalardyń jeńimpazdary men júldegerleri.
10 laýreat Qazaqstannyń atynan júlde qory 1 million AQSh dollaryn quraityn «Álem muǵalimi-2021» Jahandyq syilyǵyna (Global Teacher Prize 2021) nominatsiialanatyn bolady.
Olardyń qatarynda Syilyq jeńimpazy — Dinara Beisembaeva, jáne 9 finalǵa qatysýshylar bar. Atap aitar bolsaq:
– Olga Kim — Qaraǵandy qalasy, № 27 orta mektebiniń bastaýysh synyp muǵalimi, erekshe bilim alý qajettilikteri bar balalardyń til damytý mamany;
–Erjan Jumadilov — Taraz qalasy, daryndy er balalarǵa arnalǵan «Bilim innovatsiia» mamandandyrylǵan litsei-internatynyń fizika pániniń muǵalimi;
– Alma Mahanova — Almaty oblysy, Jambyl aýdany, Qarǵaly aýyly bastaýysh synyp muǵalimi;
– Dina Qudabaeva — Qyzyljar qalasy, «Nazarbaev ziiatkerlik mektebi» filialynyń fizika pániniń muǵalimi;
– Arnýr Qazybekov — Nur-Sultan qalasy, NURORDA mektep-litseiiniń fizika pániniń muǵalimi;
– Meiramgýl Janaspaeva — Semei qalasy, № 3 jalpy orta bilim berý mektep-kesheninde orys tili jáne ádebiet muǵalimi;
–Elena Varganova — Temirtaý qalasy, № 16 jalpy orta bilim berý mektebinde ekologiia jáne ózin-ózi taný pániniń muǵalimi;
– Janar Jaqsylyqova — Pavlodar qalasy, № 16 mektep-litseiinde bastaýysh synyp muǵalimi;
– Gúlnar Jaqypova — Nur-Sultan qalasy, «Respýblikalyq fizika-matematika mektebiniń» matematika muǵalimi.
2019 jyly Qoǵamdyq mańyzy bar bastamalardy damytý qory Global Teacher Prize Jahandyq syilyǵynyń resmi ókili atanyp, 4 000 000 teńge júlde qory taǵaiyndalǵan «Qazaqstan muǵalimi» ulttyq syilyǵyn bastady.
Baiqaýdyń maqsaty – ozyq muǵalimderdi anyqtaý, qoldaý jáne kótermeleý, sondai-aq elimizde pedagog eńbeginiń bedelin arttyrý.
«Qazaqstan muǵalimi-2020» Ulttyq syilyǵyna eńbek ótili úsh jyldan kem emes, kez-kelgen bastaýysh jáne orta bilim berý (orta mektepter, gimnaziialar, litseiler) pedagogtary qatysýǵa múmkindik aldy.
