Búgin Astanada Qazaqstan Respýblikasynda Mi-8AMT (Mi-171) tikushaǵyn qurastyrýdyń iri torabyn qurý týraly kelisimshart jasaldy, dep habarlaidy "Ult aqparat".
Qazaqstan jáne Resei prezidentteriniń arasynda buryn qol jetkizilgen kelisimderge sáikes, qujatqa QR Qorǵanys jáne aeroǵarysh ónerkásibi ministrliginiń «Qazaqstan injiniring» UK» AQ men «Rosteh» Memlekettik korporatsiiasynyń «Vertolety Rossii» AQ qol qoidy.
Tikushaqtar «№405 Avia jóndeý zaýyty» AQ óndiris alańdarynda qurastyrylyp, tapsyrys berýshiniń talaptaryna qarai beiimdeledi. Kásiporyn Mi-8/17/171 tipindegi tikushaqtardy jóndeý, jańǵyrtý jáne olarǵa tehnikalyq qyzmet kórsetý úshin qazaqstandyq jáne halyqaralyq organdardyń sertifikatyn alǵan.
Búginde memlekettik mekemeler men kommertsiialyq áýe kompaniialary respýblikadaǵy Mi-8AMT(Mi-171) tikushaqtaryna negizgi tapsyrys berýshiler bolyp otyr.
QR Qorǵanys jáne aeroǵarysh ónerkásibi ministrligi baspasóz qyzmetiniń málimdeýinshe, Qazaqstanda alǵash ret aýyr tikushaqtardy qurastyrý tehnologiiasy engizilmek, al qurastyrý óndirisi alǵash ret biýdjettik investitsiialarsyz uiymdastyryldy. Tikushaq qurastyrý óndirisiniń qolǵa alynýy elimizdiń qorǵanys-ónerkásiptik keshenin, azamattyq tikushaq indýstriiasyn, oqý-jattyǵý bazalaryn damytýǵa serpin beredi.
Aita keterligi, Mi-8AMT(Mi-171) tikushaǵyn M.L.Mil atyndaǵy Máskeý tikushaq zaýyty jasaǵan. Ony jolaýshy tasymalyna da, 4 tonnaǵa deiingi júkterdi tasymaldaýǵa da, izdeý-qutqarý jumystary jáne órt sóndirýge de paidalanýǵa bolady.
Qazirgi kezde Ortalyq jáne Ońtústik-Shyǵys Aziia, Taiaý Shyǵys, Afrika, Eýropa, Latyn Amerikasy, TMD elderinde osy markanyń túrli modifikatsiiadaǵy 1 myńnan astam tikushaǵy paidalanylady.
