Foto: Liter.kz
Qazaqstan men Vengriia joǵary oqý oryndary sý resýrstaryn basqarý jáne sý diplomatiiasyna basymdyq berilgen qos diplomdy magistratýra baǵdarlamasyn iske qosty. Joba Memleket basshysynyń Joldaýynda aitylǵan sý salasynda bilikti mamandar daiarlaý tapsyrmasyn oryndaý aiasynda júzege asýda, dep habarlaidy Ult.kz.
Baǵdarlama Qazaq ulttyq sý sharýashylyǵy jáne irrigatsiia ýniversiteti men vengriialyq Korvinýs ýniversitetiniń birlesken jumysynyń nátijesinde ázirlendi.
Biyl tamyzda Eýropalyq komissiia Erasmus Mundus Design Measure baǵdarlamasy aiasynda 60 myń eýro grant bólgen. Ol sý resýrstary men sý diplomatiiasy boiynsha integratsiialanǵan birlesken magistratýrany ázirleýge jumsalmaq. Konsortsiýmǵa Eýropanyń úsh jáne Ortalyq Aziianyń tórt ýniversiteti qatysady, olardyń qatarynda QazUSShIÝ de bar.
Qazan aiynyń sońynda Býdapeshtte sarapshylardyń alǵashqy kezdesýi ótedi. Aldaǵy 15 ai ishinde tolyq ázirlengen baǵdarlama Eýropalyq komissiiaǵa usynylady. Eger ol maquldansa, jalpy biýdjeti 5 mln eýrony quraityn, uzaqtyǵy alty jylǵa sozylatyn halyqaralyq magistratýra iske qosylady.
Sonymen qatar konsortsiým aiasynda sý resýrstaryn basqarý jáne sý diplomatiiasy jónindegi Birlesken ortalyq qurý josparlanýda. Onyń bas keńsesi Tarazdaǵy QazUSShIÝ-de ornalasady.
«Bul baǵdarlama stýdentterge halyqaralyq kelissózder júrgizý, janjaldardy taldaý jáne sý resýrstaryn ádil basqarýǵa qatysty zamanaýi praktikalyq daǵdylar beredi», – dedi ýniversitet rektory Kámshat Túsipova.
Sý resýrstary jáne irrigatsiia ministri Nurjan Nurjigitovtiń aitýynsha, búginde salalyq mamandyqtar boiynsha 2500-ge jýyq stýdent oqyp jatyr. 2025 jyly sý sharýashylyǵy kásiporyndarynda tájiribeden ótken stýdentterdiń sany 450-ge jetken.
