Britandyq taraptyń bastamasymen Qazaqstan Syrtqy ister ministri Beibit Atamqulov Ulybritaniia Syrtqy ister ministrliginiń Eýropa jáne Amerika isteri jónindegi Memlekettik ministri Kristofer Pinchermen telefon arqyly sóilesti. Bul týraly QR SIM-nen málim etti, dep habarlaidy "Ult aqparat".
Ministr britandyq saiasatkerdi onyń jaqynda bolǵan taǵaiyndalýymen quttyqtap, britandyq Úkimet pen Syrtqy ister ministrliginiń jańa basshylyǵymen konstrýktivti qarym-qatynastardyń odan ári damýyna qyzyǵýshylyqty atap ótti.
«Taraptar eki memleket arasyndaǵy strategiialyq yntymaqtastyqty odan ári nyǵaitý men keńeitýge ózara qyzyǵýshylyqty rastap, aldaǵy merzimde joǵary deńgeidegi ózara saparlar men is-sharalardy uiymdastyrý boiynsha josparlardy qarastyrdy. Atap aitqanda, kúzde Syrtqy ister ministrleri deńgeiindegi strategiialyq dialogtyń jáne Saýda-ekonomikalyq, ǵylymi-tehnikalyq jáne mádeni yntymaqtastyq jónindegi úkimetaralyq komissiianyń otyrystary, sondai-aq biylǵy. qazanda Londonda «Kazakhstan Global Investment Forum - 2019» investitsiialyq forýmy josparlanýda», - delingen vedomstvo aqparatynda.
Sondai-aq ekijaqty yntymaqtastyqtyń ekonomikalyq tusyn nyǵaitý, qarjy jáne logistika salalaryndaǵy seriktestikti keńeitý úshin Qazaqstannyń tranzittik-kóliktik áleýetin jáne «Astana» Halyqaralyq qarjy ortalyǵynyń múmkindikterin barynsha tiimdi qoldaný qajettigin atap ótti.
Mádeni-gýmanitarlyq jáne bilim salasyndaǵy yntymaqtastyqty nyǵaitý, sonyń ishinde qazaqstandyq jastar úshin Ulybritaniianyń joǵary jáne orta oqý oryndarynda bilim alý múmkindikterin arttyrý, sondai-aq eki eldiń joǵary oqý oryndary arasyndaǵy ózara yqpaldastyqty kúsheitý mańyzdylyǵy aityldy.
Ulybritaniia taýar ainalymy boiynsha Qazaqstannyń eń iri saýda seriktesteriniń ondyǵyna kiredi. 2018 jyly ekijaqty saýda 1,2 mlrd AQSh dollaryn qurady. Sonymen qatar, Ulybritaniia Qazaqstannyń alty eń iri investorlary qataryna kiredi. 2005-2018 jyldary tikelei shetel investitsiialarynyń kólemi 13 mlrd AQSh dollaryn qurady. Qazaqstanda britandyq qatysýmen 800-den asa kompaniia tirkelgen. Aǵymdaǵy jyly Qazaqstanǵa Ulybritaniia Syrtqy ister ministrliginiń Eýropa jáne Amerika isteri jónindegi Memlekettik ministri Alan Dankan jáne Ulybritaniia Premer-Ministriniń Qazaqstan boiynsha saýda ýákili Baronessa Emma Nikolson saparmen kelip ketti.
