Qasym-Jomart Toqaev Ashhabadqa memlekettik sapary barysynda Túrikmenstan Prezidenti Gýrbangýly Berdimuhamedovpen kelissóz júrgizdi, dep habarlaidy "Ult aqparat" Aqordaǵa silteme jasap.
Kelissózderge deiin Táýelsizdik alańynda saltanatty túrde resmi qarsy alý sharasy ótti. Qurmet Qaraýylynyń bastyǵy eki el basshylaryna raport berip, Qazaqstan men Túrikmenstannyń ánurandary shyrqalǵannan keiin Qasym-Jomart Toqaev pen Gýrbangýly Berdimuhamedov bir-birine resmi delegatsiialardyń quramyn tanystyrdy.
Saltanatty rásimnen keiin shaǵyn quramda kezdesý boldy. Memleketter basshylary saiasi, saýda-ekonomikalyq, kólik-tranzit jáne mádeni-gýmanitarlyq salalardy keńeitýge erekshe kóńil bóle otyryp, qazaq-túrikmen strategiialyq seriktestiginiń aýqymdy máselelerin talqylady. Sonymen qatar jahandyq jáne aimaqtyq kún tártibindegi problemalar qarastyryldy.
Qazaqstan Prezidenti baýyrlas Túrikmenstanǵa memlekettik saparmen kelýge shaqyrǵany úshin Gýrbangýly Berdimuhamedovke rizashylyǵyn bildirdi.
– Qasietti túrikmen topyraǵyna tabanymyz tigen sátten shynaiy nietterińizdi kórip, boiymyzdy erekshe sezim biledi. Ádemi Ashhabad qalasyna taǵy da kelgenime qýanyshtymyn. Qalalaryńyzdaǵy qurylystyń aýqymy men sapasy bizdi tań qaldyrdy. Saparǵa keletin bolsaq, biz buǵan óte tyńǵylyqty daiyndaldyq. Menimen birge Qazaqstan Respýblikasy negizgi vedomstvolarynyń basshylary da keldi. Biz memleketterimiz arasyndaǵy strategiialyq seriktestiktiń odan ári damýyna tyń serpin beriledi dep senemiz. Túrikmender – bizge baýyrlas halyq. Halyqtarymyz arasyndaǵy dostyqtyń tamyry tereńde. Kóp nárse bizge ortaq. Bul ortaq shekaramyzǵa da qatysty. Baýyrlas Túrikmenstan halqyna degen nietimiz taza. Strategiialyq seriktestikti damytý, memleketterimiz arasyndaǵy yntymaqtastyqty nyǵaitý máseleleri jeke baqylaýymda. Bul – bizdiń saiasatymyzdyń basym baǵyty. Osy sapar barysynda yntymaqtastyǵymyzdyń baǵytyn aiqyndaityn asa mańyzdy qujattarǵa qol qoiylady dep oilaimyn. Biz burynǵysha halyqaralyq arenadaǵy belsendi yntymaqtastyǵymyzdy jalǵastyra beremiz. Kezinde BUU Bas Assambleiasy maquldaǵan Túrikmenstannyń beitarap el mártebesine Qazaqstan zor qurmetpen qaraidy, – dedi Qasym-Jomart Toqaev.
Gýrbangýly Berdimuhamedov óziniń shaqyrýyn qabyl alyp, Túrikmenstanǵa saparmen kelgeni úshin Qasym-Jomart Toqaevqa alǵys aitty.
– Biz sizdiń memlekettik saparyńyzǵa erekshe mán berip otyrmyz. Túrikmender men qazaqtardyń rýhani-tarihi bailanystary tereńde jatyr. Sondyqtan bizdiń qarym-qatynasymyz – árqashan turaqty jáne senimdi. Bul memlekettik saparyńyz halyqtarymyz ben baýyrlas elderimizdiń igiligi jolyndaǵy týystyq ári strategiialyq ekijaqty qatynastarymyzǵa tyń serpin berip, ony múlde jańa deńgeige shyǵarýǵa múmkindik týǵyzary sózsiz. Halyqtarymyzdyń arasyndaǵy yntymaqtastyqty nyǵaitýǵa qosqan jeke úlesińiz úshin alǵys aitqym keledi, – dedi Túrikmenstan Prezidenti.
