Qazaqstannyń jáne Reseidiń poshta qyzmetteri Qazposhtanyń «Qorǵas – Shyǵys qaqpasy» AEA» jáne «Jarkent» halyqaralyq poshta almasý ornyndaǵy bond qoimalary arqyly tranzittik tasymal kólemin arttyrmaq, dep habarlaidy «Qazposhta» AQ baspasóz qyzmeti.
Taraptar tyń logistikalyq sheshimder negizinde halyqaralyq poshta jóneltilimderin Eýropa jáne TMD elderine jetkizýdi ońtailandyrýdy josparlap otyr. Bul óz kezeginde transshekaralyq elektrondyq kommertsiianyń damýyna oń yqpalyn tigizedi.
Búgin «Qazposhta» AQ Basqarma tóraǵasy Qanat Alpysbaev jáne «Resei poshtasy» AQ bas direktory Maksim Akimov Peterbor halyqaralyq ekonomikalyq forýmy aiasynda strategiialyq yntymaqtastyq týraly memorandýmǵa qol qoidy. Qujat kórshiles elderdegi poshta qyzmetteriniń halyqaralyq poshta jóneltilimderin saqtaýǵa jáne tasymaldaýǵa bailanysty tranzittik logistikalyq sheshimder salasyndaǵy yqpaldastyqty damytýǵa baǵyttalǵan.
«Biz úlken tranzittik áleýetke jáne logistikalyq infraqurylymǵa iemiz. Qolymyzdaǵy qordyń sinergiiasy basymdyqqa ie baǵyttarda yntymaqtastyqty keńeitýge jol ashady. Onyń ishinde tranzittik aǵyndardy arttyrýǵa, ońtaily logistikalyq baǵdarlardy qoldanýǵa, e-commerce damýyna jańa serpin berýge múmkindik beredi. Qazposhta «Qorǵas – Shyǵys beketi» arnaiy ekonomikalyq aimaǵynda jáne «Jarkent» halyqaralyq poshta almasý ornynda ornalasqan bond qoimalaryn damytýǵa basa nazar aýdaryp otyr. Bizdiń qýattylyqtardy barynsha maksimaldy deńgeide qoldanamyz», - dep atap ótti «Qazposhta» AQ Basqarma tóraǵasy Qanat Alpysbaev.
Qazaqstandyq jáne reseilik poshta operatorlary birlese logistikalyq ónimderdi, onyń ishinde tranzittik baǵdarlardy damytýǵa múddeli. Seriktester qoldanystaǵy Eýropadaǵy infraqurylym arqyly halyqaralyq poshta almasýdy jedeldetýdi josparlap otyr.
«Eýropadan, AQSh-tan jáne Qytaidan keletin elektrondyq kommertsiianyń aǵyny artyp jatqanyn eskersek, EEO elderiniń poshta ákimshilikteri arasynda tiimdi logistika qurý asa mańyzdy. Qazposhtamen birlese jańa tiimdi baǵdarlardy qalyptastyryp, jóneltilimderdi jedel jáne qaýipsiz jetkizýdi jáne bizdiń elderimizdiń tranzittik áleýetin iske asyrýǵa múmkindik beredi», - dep atap ótti «Pochta Rossii» AQ bas direktory Maksim Akimov.
Yntymaqtastyqtyń alǵashqy kezeńinde tranzittiń kólemi boljam boiynsha bir aida keminde 24 tonna quraidy. Onyń kólemi keleshekte naryqtyń suranysyna bailanysty eselenedi.
2020 jyly Qazaqstannan Reseige 380 myń jáne keri baǵytta 297 myńǵa jýyq halyqaralyq poshta jóneltilimi jetkizilgen. Qazaqstan aýmaǵy arqyly Qytaidan Reseige tranzit kólemi 327 tonnadan asty. Búginde QR jáne RF arasyndaǵy poshta almasý áýe jáne jer ústi kólikteri arqyly júrgiziledi.
