QR Adam quqyqtary jónindegi ýákil Elvira Ázimova men RF Adam quqyqtary jónindegi ýákil Tatiana Moskalkovamen onlain kezdesý ótkizdi, dep habarlaidy "Ult aqparat" Adam quqyqtary jónindegi institýttyń saityna silteme jasap.
Kezdesý barysynda adam quqyqtaryn ilgeriletý jáne qorǵaý salasyndaǵy odan ári yntymaqtastyq máseleleri talqylandy.
Reseilik ombýdsmen Tatiana Moskalkova Qazaqstannyń qoǵamdyq baqylaý boiynsha oń tájiribesin eskere otyryp, qazaqstandyq ombýdsmen Elvira Ázimovany RF-daǵy Adam quqyqtary jónindegi ýákildiń jáne RF-daǵy sailaý barysynda azamattardyń sailaý quqyqtaryn qorǵaý jónindegi óńirlik ombýdsmenderdiń jumysymen tanysýǵa shaqyrdy.
Kezdesý barysynda E.Ázimova Adam quqyqtaryn qorǵaý jáne kemsitpeý maqsatynda ultaralyq jáne konfessiiaaralyq kelisim salasyndaǵy ózara is-qimyldy kúsheitýdi usyndy. Eki el arasyndaǵy turaqty dostyq qarym-qatynastardy saqtaýdyń mańyzdylyǵyn atap ótti. E.Ázimova Qazaqstan men Resei Adam quqyqtarynyń jalpyǵa birdei deklaratsiiasynyń, Azamattyq jáne saiasi quqyqtar týraly halyqaralyq paktiniń, tildik belgisi boiynsha qýdalaýǵa jol bermeitin Násildik kemsitýshiliktiń barlyq nysandaryn joiý týraly halyqaralyq konventsiianyń qatysýshylary bolyp tabylatynyn eske saldy.
Qazaqstan Respýblikasy Konstitýtsiiasynyń 14-babynda: «tegine, áleýmettik, laýazymdyq jáne múliktik jaǵdaiyna, jynysyna, násiline, ultyna, tiline bailanysty eshkimdi kemsitýge bolmaidy...». Uqsas norma Resei Federatsiiasynyń Konstitýtsiiasynda qarastyrylǵan.
Osyǵan bailanysty Qazaqstandaǵy Adam quqyqtary jónindegi ýákil QR jáne RF quqyq qorǵaý organdaryna mundai faktilerdi muqiiat tekserý jáne jolyn kesý, jeke ózi jasaityn nemese kótermeleitin, onyń ishinde Internet jelilerdi paidalana otyryp, osyndai kemsitýshilikti jasaityn quqyq buzýshylardy jaýapkershilikke tartý týraly júginýdi usyndy.
E.Ázimova halyqaralyq qoǵamdastyqtyń mundai faktileri adam quqyqtarynyń óreskel buzylýy dep tanylyp, ultaralyq alaýyzdyqtyń órshýine yqpal etetinin, nátijesinde qoǵamdaǵy turaqsyzdyq pen qaqtyǵystarǵa, qaiǵyly oqiǵaǵa ákep soqtyratyn agressiiany jáne óshpendilikti týdyratynyn atap ótti.
«Memlekettik jáne basqa da tilderdi qurmetteý saiasatyn ilgeriletý adamdy jáne onyń quqyqtaryn qurmetteý qaǵidattarynda tek qana beibit jáne zańdy tásildermen júzege asyrylýǵa tiis. Bul qarapaiym azamattarǵa ǵana emes, azamattyq jáne saiasi qairatkerlerge de qatysty. Biz basqa azamattarǵa, onyń ishinde tildik belgileri boiynsha agressiiany, óshpendilikti jáne tózbeýshilikti týdyratyn jariia málimdemelerdi kótermelemeýimiz kerek», - dep atap ótti Ázimova kezdesý barysynda.
