Qazaqstan men Resei prezidentteri BAQ ókilderi úshin birlesken brifing ótkizdi, dep habarlaidy "Ult aqparat" Aqordanyń resmi saityna silteme jasap.
Ekijaqty kelissózdiń qorytyndysy boiynsha Qasym-Jomart Toqaev pen Vladimir Pýtin buqaralyq aqparat quraldarynyń ókilderi úshin birlesken málimdeme jasady.
Qazaqstan Prezidenti óz sózinde Máskeýge saparmen kelýge shaqyrǵany úshin Vladimir Pýtinge rizashylyǵyn bildirdi.
– Kelissóz óte mazmundy jáne tiimdi boldy. Osy múmkindikti paidalana otyryp, búgingi kelissózge kóńilim tolatynyn aitqym keledi. Biyl memleketterimiz úshin ataýly jyl bolmaq. Elderimiz arasyndaǵy diplomatiialyq qatynastardyń 30 jyldyǵyn atap ótemiz. Osy ýaqyt ishinde dostyqqa, ortaq tarihqa jáne halyqtarymyzdyń mentaldyq turǵydan jaqyndyǵyna súiene otyryp, memleketaralyq yntymaqtastyqtyń úlgisin qalyptastyrdyq. Tiimdi saiasi dialogtyń arqasynda barlyq baǵyt boiynsha zor jetistikterge qol jetkizdik. Bizdiń qurlyqtaǵy shekaramyz – álemdegi eń uzyn shekara. Bul búkil halyqaralyq qoǵamdastyqqa naǵyz tatý kórshiliktiń, senimdi odaqtastyq pen strategiialyq seriktestiktiń jarqyn úlgisin kórsetip otyr, – dedi Memleket basshysy.
Qasym-Jomart Toqaev óte mazmundy jáne jemisti kelissóz júrgizilgenin málimdedi. Eki el basshysy qazirgi qazaq-orys máselelerin ashyq ári ózara senim negizinde talqylady.
– Elderimiz arasyndaǵy jan-jaqty bailanystardyń joǵary deńgeidegi tabysty damýyna kóńilimiz tolatynyn atap óttik. Ózara tiimdi yntymaqtastyqtyń zor áleýetin eskere otyryp, saiasi, ekonomikalyq, investitsiialyq jáne mádeni-gýmanitarlyq qarym-qatynastardy tereńdetýge nietti ekenimizdi naqtyladyq. Biz ózara saýda-sattyqtyń oń qarqynyn saqtaýǵa ýaǵdalastyq. Pandemiia sharalaryna qaramastan, joǵary nátijege qol jetkizildi. Byltyr taýar ainalymy 21 milliard dollardan asty, – dedi Qazaqstan Prezidenti.
Qasym-Jomart Toqaevtyń aitýynsha, Resei kompaniialary Qazaqstan ekonomikasyndaǵy jetekshi investorlardyń bestigine kiredi jáne olardyń salǵan qarjylarynyń jalpy kólemi 17 milliard dollardan asady. Elimizde sheteldik kapitaldyń úlesi bar árbir úshinshi kásiporyn Resei kompaniialarynyń qatysýymen qurylǵan. Olardyń ortaq investitsiialyq portfeli barlyq salany qamtydy.
– Biz óndiris kooperatsiiasyn keńeitýdiń perspektivalaryn egjei-tegjeili talqyladyq. Bul baǵytta elderimiz qazirdiń ózinde 13 iri jobany iske asyrdy. Búginde quny 2,5 milliard dollardan asatyn 8 joba júzege asyrylyp jatyr. Budan bólek investitsiialyq quny shamamen 1,5 milliard dollar bolatyn taǵy 11 joba ázirlenýde. Kelissóz kezinde qurmetti Vladimir Vladimirovichke bul jobalardyń bári meniń jeke baqylaýymda ekenin aittym. Olardyń bári jańa jumys oryndaryn ashýǵa, elderimizdiń ónerkásip jáne tehnologiialyq áleýetin nyǵaitýǵa baǵyttalǵan. Óńiraralyq yntymaqtastyqtyń da paidasy zor. Eki el arasyndaǵy saýda ainalymynyń shamamen 70 paiyzyn óńirlerimiz arasyndaǵy ózara tiimdi saýda-sattyqtyń úlesi quraidy, – dedi Memleket basshysy.
Qasym-Jomart Toqaev Qazaqstan men Resei arasyndaǵy tabysty seriktestiktiń jańa innovatsiialyq ósim núkteleri esebinen keńeiip otyrǵanyn atap ótti. Búgin tsifrlandyrý, ǵaryshty igerý siiaqty ózekti máseleler men atom energetikasy salasynda mamandar daiarlaý boiynsha elderimizdiń ilgerileýine múmkindik beretin birqatar qujatqa qol qoiyldy.
– Qazaqstanda injenerlik-tehnikalyq sala boiynsha joǵary bilikti mamandardyń qajettigin eskere otyryp, bilim berý salasyndaǵy yntymaqtastyqqa erekshe mán berildi. Kelissóz barysynda Vladimir Vladimirovichke Qazaqstanda Reseidiń jetekshi joǵary oqý oryndarynyń filialdaryn ashýǵa keliskeni úshin rizashylyǵymdy bildirdim. Bul qadam elimizdiń bilim berý salasyn damytýǵa súbeli úles qosady dep oilaimyn, – dedi Qazaqstan Prezidenti.
Qasym-Jomart Toqaev eki taraptyń da halyqaralyq bastamalardy ilgeriletýge ózara qoldaý kórsetetinin málimdedi. Memleket basshysynyń aitýynsha, Qazaqstan halyqaralyq EKSPO kórmesin 2030 jyly Máskeýde ótkizý bastamasyn qoldaidy.
Qazaqstan Prezidenti Resei Federatsiiasynyń aimaqtaǵy turaqtylyq pen qaýipsizdikti qamtamasyz etý isindegi rólin joǵary baǵalady. Qasym-Jomart Toqaev Eýraziia keńistigindegi qaýipsizdiktiń tutastyǵyna qatysty Reseidiń ustanymyn qoldady. Atalǵan qujat 2010 jyly EQYU-nyń Astana forýmynda qol qoiylǵan Deklaratsiiada bekitilgenin eske saldy.
– Qazirgi álemde basqa memleketterdiń qaýipsizdigine zalal keltire otyryp, óz qaýipsizdigin qamtamasyz etý múmkin emes jáne tiimsiz ekenimen kelisemiz. Sondyqtan halyqaralyq aýqymdaǵy qaýipsizdikke qatysty Resei Federatsiiasynyń usynystary tabysty diplomatiialyq kelissóz ótkizýge jaqsy negiz bolady. Kelissózderdiń tek sóz úshin emes, nátijege qol jetkizý úshin júrgizilgenin qalaimyz. Túptep kelgende «jaqsy janjaldan, jaman bolsa da bitim artyq», – dedi Qasym-Jomart Toqaev.
Prezident sózin qorytyndylai kele, ótkizilgen kelissózge kóńili tolatynyn atap ótip, qonaqjailyq kórsetkeni úshin Resei tarapyna rizashylyǵyn bildirdi.
