Qazaqstan jáne Ózbekstannyń Ulttyq ulandary yntymaqtastyqty nyǵaitýda ortaq jattyǵýlar ótkizbek, dep habarlaidy "Ult aqparat" Polisia.kz-ke silteme jasap.
29 qyrkúiek pen 3 qazan aralyǵynda Ishki ister ministriniń orynbasary – Ulttyq ulan Bas qolbasshysy general-leitenant Rýslan Jaqsylyqov bastaǵan Qazaqstan Respýblikasy Ulttyq ulan Bas qolbasshylyǵynyń delegatsiiasy Ózbekstan Respýblikasynda issaparmen boldy. Sapar ózbekstandyq taraptyń shaqyrýymen qyzmettik-jaýyngerlik áreket boiynsha tájiribe almasý jáne ár túrli salada ekijaqty yntymaqtastyqty arttyrý maqsatynda uiymdastyryldy.
Qazaqstandyqtar aldymen Ózbekstan Ulttyq ulanynyń Ortalyq apparatynda bolyp, Qolbasshy general-maior Rýstam Djýraevpen kezdesti. Júzdesý barysynda birqatar kelisimder boiynsha kelissózder ótkizilip, qujattarǵa qol qoiyldy. Atap aitqanda, mańyzdy memlekettik nysandar men júkterdi kúzetý, eki el arnaiy maqsattaǵy bólimsheleriniń birikken arnaiy-taktikalyq jattyǵýlaryn, sondai-aq, Qazaqstan Ulttyq ulan Áskeri institýtymen bilim berý baǵdarlamasyn iske asyrý boiynsha tájiribe almasý máseleleri áńgime arqaýy boldy.
Sapar aiasynda QR Ulttyq ulan delegatsiiasy Qoǵamdyq qaýipsizdik ýniversitetinde, Arnaiy oqý ornynda, Tashkent qalasynyń kúzetý bólimin, Kavaleriialyq eskadronda jáne taǵy basqa da nysandarda bolyp, qyzmettik-jaýyngerlik árekettiń ár túrli máseleleri boiynsha Ózbekstan Ulttyq ulanynyń tájiribesimen tanysty.
Delegatsiia basshysy general-leitenant Rýslan Jaqsylyqov yqpaldastyq josparyna qol qoiý kezinde eki jaqty yntymaqtastyqty damytý, nyǵaitý jáne qoǵamdyq qaýipsizdik máseleleri boiynsha ózara árekettesý ári qarai jalǵasatynyna senim bildirdi.
Taraptar, sondai-aq Qazaqstan Ulttyq ulany ókilderi kinologtarynyń jeke-komandalyq jarystaryna, baqylaýshy retinde kúreń beret kvalifikatsiialyq synaqtaryna qatysýǵa, sonymen qatar taýly jáne arnaiy-taktikalyq daiyndyq boiynsha Qazaqstan jáne Ózbekstan Ulttyq ulandarynyń arnaiy maqsattaǵy jaýyngerleri arasynda tájiribelik seminar-jinalysyn ótkizý týraly kelisimge qol jetkizdi.
Budan bólek, Ózbekstan Ulttyq ulanynyń basshylyǵy Qazaqstan politsiiasynyń 30 jyldyǵyna arnalǵan áskeri-úrmeli orkestrler arasyndaǵy halyqaralyq áskeri-mýzykalyq «Áskeri kernei – 2022» festivaline jáne QR Ishki ister ministriniń kýboynae arnalǵan jekpe-jek urys boiynsha Halyqaralyq týrnirge qatysýǵa ynta tanytty.
