"Qazaqstan temir jolymen" kelisimge sáikes, 1 sáýirden bastap "Núkis – Beineý – Núkis" baǵytynda qatynaityn №647/648 poiyzy jolǵa shyǵady", dep habarlady "Ýzbekiston temir iýllari" kompaniiasynyń baspasóz qyzmeti.
Eki jylǵa sozylǵan úzilisten soń Ózbekstannyń jolaýshy poiyzy shetelge qatynai bastaidy.
Jolaýshy poiyzy "Núkis" vokzalynan seisenbi, juma jáne jeksenbi kúnderi jolǵa shyqsa, dúisenbi, sársenbi jáne senbi kúnderi Beineýden qozǵalady.
"Jaqyn sheteldegi basqa da eldermen temirjol qatynasy taraptardyń kelisimine sai ashylady", - delingen temirjol kompaniiasy taratqan aqparatta.
Ózbekstan 2020 jylǵy naýryzda koronavirýs pandemiiasyna bailanysty syrtqy temirjol qatynasyn toqtatqan.
Aqparatqa qaraǵanda, eki kún buryn eki el arasynda avtobýstar qatynasy qalypqa kele bastaǵan. Qazir Tashkent pen Nur-Sultan, Almaty jáne Qyzylorda baǵyttary boiynsha avtobýstar júrip jatyr.
