Parlament Májilisiniń jalpy otyrysynda «Qazaqstan Úkimeti men Ózbekstan Úkimeti arasyndaǵy eńbekshi migranttardyń eńbek qyzmeti jáne olardyń quqyqtaryn qorǵaý týraly kelisimdi ratifikatsiialaý týraly» zań jobasy maquldandy, dep habarlaidy "Ult aqparat".
Kelisimge 2019 jyldyń sáýirinde QR Prezidenti Qasym-Jomart Toqaevtyń Ózbekstanǵa jasaǵan memlekettik sapary aiasynda Tashkentte qol qoiylǵan bolatyn. Qujattyń maqsaty – taraptar memleketterinde kóshi-qon aǵyndaryn retteý men zańsyz eńbek qyzmetin boldyrmaý jóninde sharalardy júzege asyrý.
«Kelisimdi ratifikatsiialaý eki eldiń arasyndaǵy eńbek kóshi-qon protsesterin retteýde yntymaqtastyqtyń nyǵaiýyna yqpal etedi dep senemiz. Ratifikatsiia basqa normativtik-quqyqtyq aktilerdi qabyldaý nemese olarǵa ózgerister engizýdi talap etpeidi. Kelisimniń kúshi eki el arasyndaǵy barlyq eńbekshi kóship-qonýshylarǵa qoldanylady jáne olardyń qyzmeti men quqyqtaryn qorǵaý máselesin retteidi», - dedi QR Eńbek jáne halyqty áleýmettik qorǵaý ministri Birjan Nurymbetov.
Sonymen qatar, kelisimde ókiletti memlekettik organdar belgilengen. Qujatta ózara qatynastar boiynsha ulttyq zańnamanyń basymdyǵy rettelgen jáne qyzmetkerlerdiń, jumysshylardyń bazalyq kepildikteri bekitilgen. Ýaǵdalastyqtarǵa sáikes, eńbekshi migranttar qabyldaýshy memlekettiń zańdary men eńbek shartynyń talaptaryna sáikes demalýǵa, ainalasyndaǵy adamdar úshin qaýip tóndiretin aýrýlar kezinde tegin meditsinalyq kómektiń kepildendirilgen kólemin alýǵa quqyly.
