Parlament Senatynyń Tóraǵasynyń orynbasary Bektas Beknazarov bastaǵan Qazaqstan Respýblikasynyń delegatsiiasy Oman Memlekettik keńesiniń Tóraǵasy Iahiia ben ál-Manzeridiń shaqyrýy boiynsha Oman sultanatynda saparda boldy, dep habarlaidy "Ult aqparat" joǵary palatanyń baspasóz qyzmetine silteme jasap.
Bul Parlament depýtattarynyń Qazaqstan men Oman arasyndaǵy osy deńgeidegi alǵashqy sapary bolyp otyr.
Sapar aiasynda Memlekettik keńestiń Tóraǵasy Iahiia ben Manzerimen, onyń orynbasary sheih ál-Hatab ál-Hanaimen, Konsýltativtik keńestiń tóraǵasy sheih Halid ál-Maýalimen kezdesýler boldy, sondai-aq Sultan Kabýs ýniversitetiniń rektorymen de júzdesý josparda bar.
Kezdesý barysynda ekijaqty qarym-qatynastar, onyń ishinde parlamentaralyq yntymaqtastyqty nyǵaitý, saýda-ekonomikalyq bailanystar men halyqaralyq týrizmdi keńeitý máseleleri boiynsha pikir almasyldy.
Taraptar týrizm ekijaqty yntymaqtastyqtyń keleshegi zor baǵyty bolyp tabylatynyn, oǵan viza tártibin jeńildetý jáne Almaty men Maskat qalalary (Oman astanasy) arasynda tikelei reis ashý yqpal etetinin atap ótti. Ol eki eldiń týristik múmkindikterin paidalaný ǵana emes, sonymen qatar iskerlik belsendilikti damytýǵa da serpin beredi.
Oman sultanaty Qazaqstanmen saiasi jáne ekonomikalyq ózara tyǵyz bailanys ornatqan alǵashqy arab memleketteriniń qatarynda boldy. Qazirgi kezde Omannyń bizdiń elimizge, ásirese energetikalyq sektorǵa qatysy tiimdi jalǵasyp keledi. Taraptar munai-gaz salasyndaǵy birlesken jobalardy damytý ústinde.
Parlamentaralyq bailanystardy nyǵaitý eki el arasyndaǵy ekijaqty yntymaqtastyqty odan ári keńeitýge yqpal etetin bolady.
