Qazaqstan men Qytai birlesip túsirgen «Kompozitor» filmi 8-shi Vankýver halyqaralyq qytai kinofestivalinde «Qyzyl úieńki japyraǵy» syilyǵynyń birden tórt júldesin jeńip aldy, dep habarlaidy "Ult aqparat" Sh. Aimanov atyndaǵy Qazaqfilmge silteme jasap.
Rejisserler Sábit Qurmanbekov pen Sherizat Iakýbtyń «Kompozitor» týyndysy «Úzdik film», «Úzdik rejisser», «Úzdik áiel róli» jáne «Úzdik er adam róli» nominatsiialarynda top jardy.
Túsirilim tobynyń qýanyshty jańalyǵyn filmde basty rólderdiń birin somdaǵan qazaqstandyq aktrisa Arýjan Jazylbekova bólisti.
«Dostar! «Kompozitor» kinokartinasynyń barlyq túsirilim tobyn jeńisimen quttyqtaimyn! «Qazaqfilmge», bizdiń rejisserlerimiz Sábit Qurmanbekov pen Sherizat Iakýbqa jáne bizdiń kishkentai Dilnáz Nurseiitke (bul onyń debiýttik róli), Altynai Nógerbekke, Berik Aitjanovqa jáne Hý Tsziýnge alǵys bildirgim keledi. Bul – bizdiń ortaq jeńisimiz. Men sizderdi shyn júrekten quttyqtaimyn», - dep aqjarma tilegin jetkizdi A. Jazylbekova.
«Kompozitor» filmi belgili qytai kompozitory Sian Sinhaidyń Almatyda ekinshi dúniejúzilik soǵys kezindegi ómiri men onyń belgili qazaqstandyq kompozitor Baqytjan Baiqadamovpen dostyǵyn baiandaidy.
Filmdegi basty rólderdi Hý Tsziýn, Berik Aitjanov, Iýan Tsiýan, Arýjan Jazylbekova jáne Altynai Nógerbek somdaǵan.
