24 qazan kúni Astanadaǵy Beijing Palace Soluxe Hotel qonaqúiinde Qytai men Qazaqstan ýniversitetteriniń túlekterine arnalǵan bos jumys jármeńkesi ótti. Is-shara Qazaqstandaǵy qytai kásipkerleriniń Bas qaýymdastyǵymen birlese uiymdastyryldy, dep habarlaidy Ult.kz tilshisi.
Bul sharanyń maqsaty – Qazaqstan men Qytai arasyndaǵy bilim, mansap jáne jastar bastamalary salasyndaǵy yntymaqtastyqty damytý. Jármeńke jyl saiyn Qytai jáne qazaqstandyq joǵary oqý oryndarynyń qytai tilin meńgergen túlekterin, sondai-aq Qazaqstanda qyzmet etetin jetekshi Qytai kompaniialary men bilim berý uiymdaryn biriktiredi. Bul týraly QHR joǵary oqý oryndary túlekteri qaýymdastyǵynyń tóraiymy Aigerim Negmetjan aityp berdi:
"Osyndai jármeńkeni uiymdastyryp jatqanymyzǵa biyl tórtinshi jyl. Kezinde biz de Qytaidan diplom alyp kelgenbiz. Sol siiaqty qazir de qai jerden jumys izderin bilmei, Qazaqstandaǵy Qytai kompaniialarymen bailanys ornata almai júrgen jastar úshin bul úlken múmkindik. Bizdiń basty maqsatymyz - Qytaida oqyp kelgen qazaqstandyq stýdentter men túlekterge jaqsy jumys tabýǵa kómektesý. Bul sharany jyl saiyn dástúrli túrde ótkizip otyrǵandyqtan, qatysýshylar óte kóp. Olardyń arasynda 300-den asa joǵarǵy oqý orny túlekteri bar, al olardy jumysqa qabyldaýǵa daiyn kásiporyndardyń sany - 22", - deidi Aigerim Negmetjan.
Túlekter jármeńkeni jyl saiyn kútedi eken. Olar túiindemelerin qoldaryna ustap, áńgimelesýge daiyndalyp keletin kórinedi. Túiindemeni qaraý da, áńgimelesý de jármeńke kezinde ótip, kei túlekter dál osy jerden jumys taýyp qaitady. Aigerim Negmetjannyń sózinshe kei túlekter qazirdiń ózinde Qytai kásiporyndarynda jumys istep jatyr. Biraq budan da jaqsy kásiporyn tabý úshin jármeńkege keledi.
Aiajan Qabysheva biyl Eýraziia Ulttyq ýniversitetiniń qytai tilinen tilmash mamandyǵy boiynsha oqyp bitirgen. Ol jármeńkege alǵash kelip otyr.
"Jármeńkeniń aýqymy osyndai úlken bolady dep kútpedim. Kóńilim tolyp otyr. Joǵarǵy oqý ornyn bitirgen árbir túlek eń áýeli "qaidan jumys izdeimin?" dep basy qatady. Kez kelgen jerge barsań aldymen jumys tájiribeńdi suraidy. Sol sebepti osyndai jármeńkelerdiń bir paidasy - túlekter men jumys berýshilerdiń arasynda bailanys ornaidy. Árkim ózine kerek adamdy kezdestire alady. Bir jaǵynan bul jerde seni eshkim aldap ketpeidi, resmi tirkelgen, senimdi kompaniialar jumys usynady. Ekinshi jaǵynan biz óz baǵytymyzǵa sai bos jumys ornyn taba alamyz", - deidi Aiajan Qabysheva.
Suhbattasymyzdyń pikirinshe qazirgi ýaqytta Qazaqstanda qytai tili mamandaryna suranys kóp. Sáikesinshe osy mamandyqty igergen jastar da jetkilikti.
"Bálkim Qazaqstan men Qytai arasynda bailanystyń nyǵaiýynan shyǵar, sońǵy kezde qytai tilin meńgergen mamandar kóbeigen. Sol sebepti de jumys tabý qiyndap ketti. Mysaly biz oqýǵa túsken jyldary qytai tilin oqýdy tańdaǵan stýdentter, qytai tilin biletin mamandar az bolatyn. Al qazir óte kóp. Sebebi Qytai qazir álemde ekonomikasy qarqyndy damyp jatqan elderdiń biri. Qytaimen bailanys ornatý kez kelgen el úshin óte mańyzdy. Qazaqstan úshin de dál solai. Qazir jastar aqyldy. Olar Qytaimen bailanys ornatýdyń jáne qytai tilin bilýdiń mańyzdylyǵyn túsinedi. Buryn aǵylshyn tilin bilý mańyzdy bolsa, qazir qytai tili de meńgerý talap etiletin bolǵan", - deidi túlek.
QHR joǵary oqý oryndary túlekteri qaýymdastyǵynyń tóraiymy A. Negmetjannyń sózinshe Qytai men Qazaqstan arasynda bailanys jyldan jylǵa nyǵaiyp jatyr.
"Eki el arasynda vizasyz rejim engizilgen. Qazir Qytai Halyq Respýblikasynan Qazaqstanǵa jumys isteýge kóptegen kompaniialar kelip jatyr. Olar qytai tilin biletin mamandar izdeidi. Sondyqtan qytai tilin bilý úlken múmkindikter ashady. Pandemiiadan keiin Qytaida bilim alýǵa suranys azaiǵan, qazir kerisinshe qaita artyp otyr. Sebebi ata-analar qytai tiliniń bolashaǵyn túsinip otyr", - deidi ol.
Qazirgi ýaqytta Qazaqstan men Qytai arasynda bilim salasy boiynsha seriktestik nyǵaiǵan.
"Jyl saiyn qańtar, aqpan ailarynda Qytai Úkimeti Qazaqstan Úkimetine stýdentterge arnap tolyq granttar bóledi. Bizde Qytai ýniversitetteri ashylyp jatyr. Biyl Astanada Pekin shet tilderi jáne mádenieti ýniversiteti ashyldy. Qazaqstanda úshinshi Lýban sheberhanasy ashyldy. Sondyqtan ýniversitet bazasynda ǵana emes, tehnologiialyq baǵytta bizdiń mamandardy oqytyp jatyr", - deidi Aigerim Negmetjan.
Baǵdarlama aiasynda quttyqtaý sózder, kompaniialardyń tanystyrylymdary jáne jumys izdeýshilermen ekspress-suhbattar ótti. Jármeńke barysynda túlekter kompaniia ókilderimen tikelei tildesip, keńes alyp, qytai kásiporyndarynyń bos jumys oryndarymen tanysý múmkindigine ie boldy.
