Sybailas jemqorlyqqa qarsy is-qimyl agenttigi sheteldik seriktesteriniń jelisin keńeitý maqsatynda Parasattylyq jáne sybailas jemqorlyqqa qarsy is-qimyl komissiiasynyń (budan ári – komissiia) basshylyǵymen jáne Iordaniianyń Qazaqstandaǵy elshisi Iýsýf Abdelganimen onlain kezdesý ótkizdi, dep habarlaidy "Ult aqparat" vedomstvonyń baspasóz qyzmetine silteme jasap.
Sybailas jemqorlyqqa qarsy vedomstvonyń basshysy Alik Shpekbaev iordaniialyq áriptesterin jumys nátijesimen jáne elimizde júrgizilip jatqan keshendi reformalarmen tanystyryp, saiasi jańǵyrtýdyń mańyzdylyǵyn atap ótti. Sondai-aq, ol sybailas jemqorlyq quqyq buzýshylyqtary úshin qylmystyq jaýapkershilikti kúsheitýge jáne aldyn alýǵa baǵyttalǵan sybailas jemqorlyqqa qarsy zańnamanyń novellalaryna nazar aýdardy.
Buǵan deiin óz hatynda komissiia tóraǵasy Mýhannad Hidjazi elimizdiń jetistikterin, halyqaralyq reitingilerde aitarlyqtai ósýdi atap ótti. Óz kezeginde Elshi Iýsýf Abdelgani Qazaqstanda turyp, sybailas jemqorlyqqa qarsy is-qimyldaǵy jaqsartý men eleýli jetistikterge kóz jetkizgenin atap ótti.
Iordaniia vedomstvosynyń bas hatshysy Asam Taraýne sybailas jemqorlyqqa qarsy saiasattyń qalyptasý tarihy týraly egjei-tegjeili aityp berdi. Onyń tarihy 2005 jyly BUU-nyń Sybailas jemqorlyqqa qarsy konventsiiasyn ratifikatsiialaýdan bastaý alyp, para berý ýádesin/usynysyn kriminalizatsiialaý, yqpal etý saýdasy jáne aqshany jylystatý bóliginde pysyqtalyp jatqan bastamalarǵa deiin jalǵasady.
Eki memlekettik organnyń qyzmeti, fýnktsiialary men basymdyqtary kóbine sáikes keledi. Mysaly, Iordaniianyń sybailas jemqorlyqqa qarsy is-qimyl Ulttyq josparynda kózdelgen jobalardyń 70%-y aldyn alýǵa baǵyttalǵan.
Kezdesý qorytyndysy boiynsha taraptar Yntymaqtastyq týraly memorandýmǵa qol qoiý jáne turaqty negizde ózara keńester uiymdastyrý týraly kelisti.
