Búgin Qazaqstan men Germaniia arasyndaǵy diplomatiialyq qatynastardyń ornaǵanyna 30 jyl tolýyna orai QR Syrtqy ister ministriniń orynbasary Roman Vasilenko men GFR SIM-niń Shyǵys Eýropa, Kavkaz jáne Ortalyq Aziia elderimen yntymaqtastyq máseleleri jónindegi ýákili Mattias Liýttenbergtiń tóraǵalyǵymen Nur-Sultan qalasynda kezekti qazaq-german saiasi konsýltatsiialary ótti. Bul týraly QazAqparat SIM silteme jasap habarlaidy.
GFR-dyń QR-daǵy Elshisi Monika Iverzen, Qazaqstan men Germaniianyń diplomattary jáne salalyq sarapshylary qatysqan ekijaqty dialog dostyq jáne syndarly atmosferada ótti.
Ózara is-qimyldyń birqatar ózekti máseleleri talqylaýymen qatar konsýltatsiialar diplomatiialyq qatynastardyń alǵashqy úsh onjyldyǵynyń maǵynaly qorytyndysyn shyǵarýǵa sebep boldy. Atap aitqanda, joǵary jáne asa joǵary deńgeidegi turaqty saparlarmen almasý, ósip kele jatqan ekonomikalyq kórsetkishter, BUU, EQYU jáne basqa da halyqaralyq institýttar sheńberindegi jemisti ózara is-qimyl oń atap ótildi.
Kelissózderge qatysýshylar Qazaqstandaǵy demokratiialyq reformalardy júzege asyrý jáne eki eldiń azamattyq qoǵamy deńgeiinde dialog ornatý aiasynda QR men GFR yntymaqtastyǵynyń jańa múmkindikterine erekshe nazar aýdardy. Sonymen qatar, konsýltatsiialar sheńberinde qazaqstandyq diplomattar nemis tarapyna qańtardaǵy qaiǵyly oqiǵalardy tergeý jáne elimizdiń áleýmettik-ekonomikalyq damýy boiynsha memlekettik strategiialardy iske asyrý týraly ózekti aqparatty usyndy.
Búginde eki el arasynda qol jetkizilgen 35-ten astam kelisim bar, onyń ishinde Prezident Qasym-Jomart Toqaevtyń 2019 jylǵy jeltoqsanda jáne 2020 jylǵy aqpanda Germaniiaǵa saparlary sheńberinde jasalǵandar. Taraptar qoldanystaǵy quqyqtyq baza strategiialyq áriptestiktiń barlyq salalarynda ózara is-qimyldy óristetýge tiisti jol ashady degen ortaq pikirge keldi. Buǵan negizinen ekonomikalyq diplomatiianyń tiimdi institýttary: Nemis investorlarymen jumys jónindegi úkimettik jumys toby, Berlin Eýraziialyq klýby jáne Saýda-ekonomikalyq yntymaqtastyq jónindegi úkimetaralyq jumys toby yqpal etýde.
Sondai-aq, saýda salasyndaǵy oń dinamika atap ótildi: GFR Qazaqstannyń jetekshi saýda áriptesteriniń qataryna kiredi, al bizdiń elimiz Ortalyq Aziia óńirindegi german biznesiniń basty seriktesi bolyp tabylady. Sońǵy 15 jyldyń ishinde ǵana Germaniiadan Qazaqstanǵa tikelei investitsiialar 5,3 mlrd. AQSh dollaryn qurady, olardyń basym úlesi (shamamen 80%) aýyl sharýashylyǵy, JEK, densaýlyq saqtaý, kólik logistikasy jáne basqa da basym salalardy sapaly damytýǵa baǵyttalǵan.
Nemis tarapynyń sońǵy statistikalyq málimetterine sáikes, ótken jyldyń 8 aiynda eki eldiń taýar ainalymynyń kólemi 3,4 mlrd. eýrony qurady, bul jalǵasyp jatqan KOVID-19 pandemiiasynyń aiasynda jyl saiyn 25,3%-ke aitarlyqtai ósimdi kórsetedi.
Is-shara sońynda R. Vasilenko men M. Liýttenberg Qazaqstan-Germaniia yntymaqtastyǵynyń damýyna qanaǵattanýshylyq bildirip, ekijaqty ózara is-qimyldyń barlyq spektri boiynsha birlesken jumysty jalǵastyrýǵa kelisti.
