Foto: Akorda.kz
Memleket basshysy Qasym-Jomart Toqaev Aqordada Qazaqstanǵa resmi saparmen kelgen Frantsiia Prezidenti Emmaniýel Makronmen kelissóz júrgizdi, - dep habarlaidy "Ult aqparat" Aqordanyń baspasóz qyzmetine silteme jasap.
Kelissóz aldynda Qasym-Jomart Toqaev pen Emmaniýel Makron bir-birine resmi delegatsiia múshelerin tanystyrdy. Qurmet qaraýylynyń bastyǵy memleketter basshylaryna raport berip, eki eldiń ánurandary shyrqaldy. Sodan keiin prezidentter shaǵyn quramda kelissóz júrgizý úshin Shyǵys zalyna bardy.
Qasym-Jomart Toqaev Emmaniýel Makronǵa iltipat bildirip, jyly qarsy aldy.
– Prezident myrza, biz úshin búgin úlken oqiǵa. Sizdiń saparyńyzdy bárimiz quptaimyz. Meniń shaqyrýymdy qabyl alyp, Qazaqstanǵa resmi saparmen kelgenińiz úshin alǵys aitamyn. Qazaqstan men Frantsiia arasyndaǵy yntymaqtastyq jaqsy damyp kele jatyr. Degenmen ekijaqty qarym-qatynasqa tyń serpin berý kerek. Sondyqtan sizdiń saparyńyzdy tarihi, óte mańyzdy dep aitýǵa bolady. Búgingi kelissózder nátijeli bolatynyna senimdimin. Oǵan eshqandai kúmánim joq, – dedi Toqaev.
Memleket basshysy Frantsiia Qazaqstannyń Eýropa Odaǵyndaǵy basty jáne senimdi seriktesi, sondai-aq el ekonomikasynyń iri investorynyń biri ekenin atap ótti.
Óz kezeginde Emmaniýel Makron Qazaqstan men Frantsiia arasyndaǵy bailanystarǵa joǵary baǵa berdi.
– Prezident myrza, resmi saparmen kelýge shaqyrǵanyńyz úshin alǵys aitamyn. Astanaǵa kelip, Sizben júzdesip otyrǵanyma qýanyshtymyn. Osy sapardy uiymdastyrǵanyńyzǵa rizashylyǵymdy bildiremin. Bul sapar bizdiń ekijaqty seriktestigimiz úshin mańyzdy jylmen tuspa-tus kelip otyr. Búgin biz ózekti halyqaralyq máseleler boiynsha pikir almasyp, BUU Jarǵysyn, sonyń ishinde aýmaqtyq tutastyq, ulttyq táýelsizdik qaǵidattaryn saqtaýǵa beiildi ekenimizdi taǵy da naqtylai alamyz. Sonymen qatar ekijaqty yntymaqtastyq máselelerin talqylaimyz. Biz - ekonomikalyq turǵydan seriktes eldermiz. Sondai-aq Qazaqstan men Frantsiia arasyndaǵy ekonomikalyq-strategiialyq áriptestigimizdi odan ári damyta túsetin mańyzdy kelisimderge qol qoiamyz. Sizben júzdesip, ortaq kún tártibin talqylaý múmkindigi týǵany úshin qýanyshtymyn, – dedi Frantsiia Prezidenti.
Memleketter basshylary qazaq-frantsýz strategiialyq seriktestiginiń qazirgi jai-kúii men damý perspektivalaryn talqylady. Saiasi dialogty nyǵaitýǵa, saýda-ekonomikalyq, investitsiialyq, energetikalyq, kólik-logistikalyq jáne mádeni-gýmanitarlyq salalardaǵy yntymaqtastyqty keńeitýge erekshe nazar aýdaryldy.
Budan bólek, Qasym-Jomart Toqaev pen Emmaniýel Makron halyqaralyq jáne óńirlik kún tártibindegi ózekti máseleler jóninde pikir almasty.
Ekijaqty kezdesýden keiin memleketter basshylary kelissózderdi eki el delegatsiialarynyń qatysýymen keńeitilgen quramda jalǵastyrdy.
