Qazaqstan Prezidenti Qasym-Jomart Toqaev Eýropa Keńesi Parlamenttik assambleiasynyń tóraǵasy Rik Demsti qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Qazaqstan men Eýropa Keńesi arasyndaǵy yntymaqtastyqtyń damý perspektivalary talqylandy. Sondai-aq aimaqtyń kún tártibiniń ózekti máseleleri, onyń ishinde Aýǵanstandaǵy ahýal sóz boldy.
Qasym-Jomart Toqaev Rik Demske iltipat bildire otyryp, onyń sapary ataýly data – Qazaqstan Táýelsizdiginiń 30 jyldyǵymen tuspa-tus kelgenin atap ótti.
– Sizdiń saparyńyzdy dál ýaqytynda jasaldy dep sanaimyn. Óitkeni ol bizge qol jetkizgen jetistikterimizdi qorytyndylaýǵa jáne yntymaqtastyqtyń jańa baǵyttaryn pysyqtaýǵa múmkindik beredi, – dedi Prezident.
Memleket basshysy Eýropa Keńesi Parlamenttik assambleiasymen jan-jaqty dialogty jalǵastyrýdyń mańyzdy ekenin atap ótti. Sonymen qatar Qasym-Jomart Toqaev Rik Demske adam quqyqtary men zań ústemdigin nyǵaitýǵa jáne jemqorlyqqa qarsy kúreske baǵyttalǵan Qazaqstandaǵy demokratiialyq reformalardyń júzege asyrylýy jóninde aitty.
Eýropa Keńesi Parlamenttik assambleiasynyń tóraǵasy Qazaqstanda júrgizilip jatqan saiasi reformalardy quptap, elimizdiń Azamattyq jáne saiasi quqyqtar týraly halyqaralyq paktiniń Ekinshi Fakýltativtik hattamasyna qol qoiǵanyn erekshe atap ótti.
