Qazaqstan men Braziliia atom energiiasy týraly shart jasaspaq. Bul týraly búgin QR Syrtqy ister ministrligindegi brifingte Qazaqstannyń Braziliiadaǵy Elshisi Qairat Sarjanov aitty, dep habarlaidy QazAqparat tilshisi.
Brifing barysynda Elshi aǵymdaǵy jyly «Qazatomónerkásip» kompaniiasy braziliialyq «Indústrias nucleares do Brasil» (INB) kompaniiasyna tabiǵi ýran kontsentratyn jetkizý boiynsha tenderde jeńip shyqqanyn, kelisim shartttarǵa sáikes Qazatomónerkásip belgilengen merzimde ýran jetkizip bergenin aitty.
«Qazaqstanǵa saparǵa shyǵar aldynda INB prezidentimen kezdestim. Bizdiń ulttyq kompaniiamen yntymaqtastyq múmkinshilikterin jan-jaqty talqyladyq. Braziliialyq mamandar qazaqstandyq sarapshylardy Rio-de-Janeirodaǵy atom stansasyna kelýge shaqyrady jáne qazaqstandyq tabiǵi ýran kontsentratyn odan ary importtaýǵa múddelik tanytyp otyr. Degenmen, mundai protsedýra Braziliia zańnamasyna sáikes tender arqyly júzege asyrylady. Olar tenderdiń jariialanatyndyǵyn nemese jariialanbaityndyǵyn ázirshe bilmeidi. Biraq, ondai tender jariia etile salysymen biz qajetti qujattardy beremiz», - dedi Elshi.
Sonymen qatar, Qairat Sarjanov atom energiiasyn beibit maqsatta paidalaný salasyndaǵy yntymaqtastyq týraly kelisim jobasy kelisilip jatqanyn aitty. Jalpy, Braziliia búginde iadrolyq tehnologiianyń tolyq tsikline ie bolyp otyrǵan 10 eldiń biri sanalady.
Aita keteiik, aǵymdaǵy jyldyń qańtar-tamyzynda Qazaqstan men Braziliia arasyndaǵy taýar ainalymynyń kólemi 82,3 mln dollardy qurady. Qazaqstan Braziliiadan qant, tabak, ushaq, mashina jabdyqtary men onyń bólshekterin, qurylys materialdaryn alady. Al elimizden Braziliiaǵa temir men kremniidiń ferroqorytpasy, plastmass buiymdar, rezeńke men qara metall eksporttalady.
