Syrtqy ister ministri Beibit Atamqulov Birikken Arab Ámirlikteriniń Qazaqstan Respýblikasyndaǵy Elshisi Muhammad ál-Djaberdi qabyldady, dep habarlaidy QR Syrtqy ister ministrliginiń baspasóz qyzmeti.
Taraptar ekijaqty saiasi, ekonomikalyq jáne mádeni-gýmanitarlyq yntymaqtastyqtyń jai-kúii men perspektivalary, óńirlik jáne halyqaralyq kún tártibindegi ózekti máselelerge qatysty keń aýqymdy máselelerdi talqylady.
«Qazaqstan Respýblikasy men Birikken Arab Ámirlikteri sońǵy jyldary eleýli oń serpin alǵan dástúrli dostyq, áriptestik qarym-qatynastardy bailanystyrady. Biz barlyq salalardaǵy ózara tiimdi bailanystardy odan ári de belsendi túrde arttyrýǵa, halyqaralyq kún tártibindegi ózekti máseleler boiynsha ustanymdardy salystyrýǵa, Qazaqstan-ámirliktik eki jaqty qatynastardyń quqyqtyq negizderin nyǵaitýǵa birlesip járdemdesýge niettimiz», - dedi SIM basshysy.
Kezdesý barysynda ámirlik Elshi ministrge BAÁ Prezidenti Sheih Halifa ben Zaid Ál Nahaiannyń Qazaqstan Respýblikasynyń Prezidenti Qasym-Jomart Toqaevqa Ámirlikterge saparmen kelip qaitýǵa shaqyrýyn tabys etti.
Eki eldiń syrtqy saiasi vedomstvolarynyń basshylary teń tóraǵalary bolyp tabylatyn Qazaqstan-ámirlik úkimetaralyq komissiiasynyń 7-shi otyrysyna daiyndyq kelissózderdiń erekshe taqyryby boldy. Taraptar bul komissiia ekijaqty saýda-ekonomikalyq yntymaqtastyqty tereńdetýdiń basty tetigi bolyp tabylatynyna kelisti.
Ǵaryshty igerý boiynsha birlesken yntymaqtastyq keń perspektivalary ashady. Osyǵan bailanysty, taraptar №1 alańda («Gagarindyq start») «Soiýz» starttyq keshenin jáne ushyrý qyzmetteriniń álemdik naryǵynda suranysqa ie «Soiýz-2» orta klasty zymyran tasyǵyshyn jańǵyrtý jolymen «Baiqońyr» ǵarysh ailaǵynda ǵarysh zymyran keshenin qurý jónindegi jobanyń mańyzdylyǵyn atap ótti. Qazaqstan jáne Emirattarmen qatar Resei Federatsiiasy da jobanyń seriktesi bolyp tabylady.
Ámirlik tarap BAÁ ǵarysh salasyn damytýǵa qoldaý kórsetkeni jáne yntymaqtastyǵy úshin Qazaqstanǵa alǵys bildirdi. Elshi sondai-aq, 25 qyrkúiekte Baiqońyr ǵarysh ailaǵynan birinshi ámirlik ǵaryshker Hazaa ál-Mansýridiń ushýy josparlanǵanyn jáne osy startqa BAÁ Joǵary bilim berý memlekettik ministri, Ulttyq ǵarysh agenttiginiń tóraǵasy Ahmad Belhýl Ál Falasidiń qatysýy josparlanǵanyn habarlady.
