QR Bilim jáne ǵylym vitse-ministri Sholpan Karinova Dúniejúzilik banktiń mektepterge kompiýter satyp alýǵa beretin qaryzynan nelikten bas tartylǵandyǵyn túsindirdi, dep habarlaidy QazAqparat.
«Áleýmettik jelilerde kóterilip jatqan taǵy bir másele bul – Dúniejúzilik bank zaimy. Osyǵan bailanysty da birden túsinik berip ketkim keledi. Bul qaryzdy alý boiynsha másele 2014 jyly bastalǵan bolatyn. Sol jyly bul sheshim bekitilip, 2018 jyly barlyq depýtattar iske asyrylý kerektigin qoldady. 2018 jyly tiisti biýdjettik usynymdar boiynsha biýdjettik josparlaý jáne halyqaralyq qaryz bolǵandyqtan resmi jumystaryn júrgizý isteri atqaryldy. Qaryzdyń basqa da jobalardaǵydai bekitilgen jospary bar. Osy josparǵa sai tiisti jumystar júrgizilip jatyr. Búginde depýtattar «osy qaryz kóleminde josparlanǵan kompiýterlik tehnikalar nege satyp alynbady?» degen másele kóterýde. Jalpy, bul kompiýterlerdi satyp alý máselesi 2021 jylǵa josparlanǵan bolatyn. Tiisti qarajat ta 2021 jylǵa qarastyrylǵan», - dedi vitse-ministr búgin Ortalyq kommýnikatsiialar qyzmetindegi baspasóz máslihatynda.
Sholpan Karinovanyń aitýynsha, atalǵan qaryz aiasynda kontenttik jumystardy josparlap aiaqtaý, onyń ishinde bilim sapasyn jaqsartý, oqýlyqtarǵa, inkliýzivti bilim berý, jalpy pedagogikalyq bilimdi jańartý máselelerine bailanysty jobalardy iske asyrý kózdelgen. Osy jumystardy aiaqtaǵannan keiin ǵana kompiýterlik tehnikalar satyp alý josparlanǵan.
«Al biylǵy indet eshkimge aityp kelgen joq. Sondyqtan kompiýterlik tehnikalardy tez satyp alý jumystaryn Bilim ministrligi qolǵa alyp kórdi. Naýryz aiynda Dúniejúzilik bankke habarlasyp, tehnikalardy tezirek satyp alý máselesin qozǵaǵan edik. Biraq, bul Úkimet tarapynan qosymsha qarajat qajet etetin boldy. Odan keiin 2021 jylǵa josparlanǵan qarajatty respýblikalyq biýdjetti naqtylaý kezinde 2020 jylǵa jyljytý máselesi týyndady. Jalpy, halyqaralyq rásimder boiynsha bul 9-dan 12 aiǵa deiin ýaqytty alatyn protsess. Sondyqtan eger biz atalǵan qaryz kóleminde kompiýterler satyp alý jumysyna osy jyldyń naýryz aiynda kiriskenniń ózinde de konkýrstyq jumystar kelesi jyldyń naýryzynda ǵana aiaqtalýy tiis. Sodan keiin jetkizý jumystary bastalar edi. Osy jaǵdai eskerilip, kompiýterlik tehnikany satyp alý máselesine bailanysty qaryzdy toqtatý sheshimi qabyldandy», - dedi ol.
Onyń atap ótýinshe, mektepterdi kompiýterlik tehnikamen jabdyqtaýǵa respýblikalyq jáne jergilikti biýdjetterden qarjy qarastyrylǵan.
Aita keteik, Parlament Májilisiniń jalpy otyrysynda «Aq jol» fraktsiiasynyń depýtaty Daniia Espaeva Dúniejúzilik bank zaimyna qatysty Úkimet basshysy Asqar Maminniń atyna depýtattyq saýal joldady.
