Qazaqstannyń Tuńǵysh Prezidenti Japoniia Úkimetiniń «Arhiv-2025» baǵdarlamasy aiasynda tehnikalyq kómek jáne noý-haýdy berý jónindegi jobasymen tanysty, dep habarlaidy "Ult aqparat" elbasy.kz saityna silteme jasap.
«Arhiv-2025» baǵdarlamasy aiasynda Qazaqstan men Japoniianyń birlesken jumys josparlaryn qarastyrǵannan keiin, Elbasy japondyq tarapqa jyly qabyldaýy men jemisti yntymaqtastyǵy úshin alǵys aitty.
– Sońǵy jyldary qurmetti Imperator Akihitomen jáne Japoniia Úkimetiniń basshylyǵymen óte jyly qarym-qatynastar ornattym. Imperator Narýhitomen de halyqtarymyzdyń igiligi úshin jemisti seriktestiktiń damitynyna senimdimin, – dedi Nursultan Nazarbaev.
Qazaqstannyń Tuńǵysh Prezidenti «Rýhani Jańǵyrý» baǵdarlamasynyń júzege asyrylý barysyna da toqtaldy.
– «Rýhani Jańǵyrý» negizgi elementteriniń biri - «Arhiv-2025» jobasy, ol ejelgiden qazirgi zamanǵa deiingi barlyq otandyq jáne sheteldik muraǵattardaǵy irgeli zertteýlerdi qamtidy. Men Japoniia Úkimetine jáne Mádeniet agenttiginiń tóraǵasyna osy baǵdarlamany júzege asyrýda kórsetken qoldaýy úshin alǵysymdy bildiremin. Sonyń arqasynda biz elektrondy bilim keńistigin quryp, derekterdi muraǵattaý salasyndaǵy aldyńǵy qatarly japondyq tájiribege ie bolamyz, – dedi Elbasy.
Japoniianyń Mádeniet agenttigi Qazaqstanda muraǵat derekterin tsifrlandyrý boiynsha birlesken jobany júzege asyrýǵa múddeli. Jobanyń nátijesi biryńǵai elektrondy kitaphanada jinaqtalǵan, tsifrlandyrylǵan kitap, muraǵat, mýzei qorlary negizinde elektrondyq bilim keńistigin qalyptastyrý bolmaq.
Japon taraby zertteý, muraǵat derekterin esepke alý jáne saqtaý tehnologiialaryn berýge, zertteý ádisterimen bólisýge jáne materialdardy tsifrlandyrýǵa daiyn ekendikterin bildirdi.
