Qazaqstannyń syrtqy ister ministrligi Qytaida ata-analary qalǵan qazaqstandyq balalardyń máselesinen habardar. Bul týraly Azattyqqa ministrliktiń ókili Aibek Smadiiarov málimdegen.
Smadiiarovtiń sózinshe, qazir ministrlik balalarynan ajyrap, Qytaida qalǵan qazaqtar máselesine qatysty Pekinmen jumystar júrgizip jatyr.
- Balalary Qazaqstanda, ózderi Qytaida qalǵan qazaqtardyń máselesin bilemiz. Diplomatiialyq arnalar arqyly birneshe nota joldadyq. Aty-jónderin de jiberdik. Keibir balalardyń ata-analaryn bilmeimiz. Kómek kerek bolsa, resmi túrde syrtqy ister ministrligine habarlassa bolady, - dedii Smadiiarov.
2 qarashada Qytaida ata-analary qalǵan alpys shaqty bala Almatyda jiyn ótkizip, Qazaqstan biliginen, halyqaralyq uiymdardan kómek suraǵan.
Buǵan deiin Shyńjańnyń túrli aýdandarynan Qazaqstanǵa kóship kelgen qazaqtar Almatyda kezek-kezek baspasóz máslihatyn ótkizip, Qytaida qamalǵan týystaryn bosatýǵa bilikten jáne halyqaralyq qaýymdastyqtan arasha suraǵan. Qyrkúiektiń sońynda Shyńjańnyń Muńǵylkúre aýdanynan kóship kelgen qazaqtar ótkizgen jiynda prokýratýra ókilderi kelip, mundai jiyn ótkizýge bolmaityny týraly eskertip ketken.
Qytaidaǵy etnikalyq azshylyqqa qysym kórsetilip jatqanynan ózge az ulttar ókilderi balalarynyń quqyǵy da halyqaralyq uiymdardyń nazaryna iligip, alańdaýshylyq týdyrǵan. Qytai elde "saiasi-tárbie lagerleriniń" bar ekenin moiyndasa da, etnikalyq azshylyqqa qysym joq dep keledi.
