QR Qarjy, QR Indýstriia jáne infraqurylymdy damytý jáne QR Syrtqy ister ministrlikteri Qazaqstan-Qytai shekarasyndaǵy pýnktterde ótkizý múmkindikterin arttyrý boiynsha sharalardy ázirleýde, dep habarlaidy "Ult aqparat".
QR Qarjy ministrliginiń baspasóz qyzmetinen málim etkendei, usynylǵan sharalar týraly QR Premer-Ministriniń birinshi orynbasary Álihan Smaiylovtyń tóraǵalyǵymen ótken kezekti keńeste aityldy.
«Qarjy ministrliginiń Memlekettik kirister komiteti (MKK) Qytai tarapymen «Qaljat-Dýlaty» jáne «Maiqapshaǵai-Zimýnai» ótkizý pýnktterin ashý týraly kelissózder júrgizýde. Sondai-aq, MKK qytailyq tarap qabyldaityn avtokólik quraldarynyń sany belgilengen baqylaý-ótkizý pýnktteri arqyly taýarlardy ótkizý tártibin (reglament) aiqyndaýdy jáne jemister men kókónisterdi tasymaldaýshylar úshin «jasyl dáliz» uiymdastyrý qajettiligin alǵa tartýda», - delingen aqparatta.
Ministrlikten atap ótkendei, «Nur joly» baqylaý-ótkizý beketinde kontaktisiz júk tasymaly qytailyq tirkemelerdiń kólik-logistikalyq ortalyǵyna (KLO) kirýine múmkindik berý arqyly júzege asyrylýda.
«Biylǵy 10 qarashadan osy model boiynsha qytai taýarlary bar 538 kólik tirkemesi ákelindi. Olar mejeli aimaqtarǵa ótý úshin KLO-da qazaqstandyq tasymaldaýshylardyń kólikterine qaita júkteldi. Qazaqstannyń Syrtqy ister ministrliginiń málimetine sáikes, Qytai tarapy júkterdi KLO-da kontaktisiz tasymaldaý úshin tartqyshtar sanyn kóbeitýdi suraidy.
Komitet júkterdi «Nur joly» baqylaý-ótkizý beketindegi kólik-logistikalyq ortalyqtan túsirgennen keiin qaityp kele almaityn qytai tirkemelerin qaitarý mehanizmin ázirlep jatyr. Sondai-aq, «Nur joly» beketi jumys ýaqyty QHR Memlekettik keden qyzmetkerleriniń jumysymen sáikestendiriledi dep josparlanýda», - dedi QR Qarjy ministrliginiń baspasóz qyzmetinen.
A.Smaiylov tasymaldaýǵa qatyspaityn avtomobilder men kólik quraldarynyń kezegin boldyrmaý maqsatynda biylǵy 23 qazanda engizilgen elektrondy kezekti eki ai ishinde ýákiletti organdardyń málimetter bazasymen integratsiialaýdy tapsyrdy.
QR Syrtqy ister ministrliginiń habarlaýynsha, QHR biligi qabyldaǵan sharalar sondai-aq, Resei, Mońǵoliia jáne Qyrǵyzstanmen shekarada kirý rejiminiń kúsheiýine ákeldi. Resei-Qytai shekarasyndaǵy baqylaý-ótkizý beketteri de óte shekteýli rejimde jumys isteidi, bul kóbinese shekara aimaǵynda keptelisterge alyp kelýde.
«Aǵymdaǵy jyldyń 9 aiynyń qorytyndysy boiynsha júk tasymaldaý kólemi ótken jyldyń sáikes kezeńimen salystyrǵanda 70% tómendedi. Aita keteiik, Qazaqstan-Qytai shekarasyndaǵy 5 avtokólik beketiniń tek 3-eýi ǵana jumys isteýde. QHR jaǵynan «Dýlaty» (Qazaqstan jaǵynanan – «Qaljat») jáne «Zimýnai» (Qazaqstan jaǵynan – «Maiqapshaǵai») ótkizý pýnktteri jabyldy», - delingen taratylǵan aqparatta.
