Qazaqstan Qytai arqyly jylyna 2 mln tonna kómir eksportqa shyǵarady. Bul týraly búgin Ortalyq kommýnikatsiialar qyzmetindegi brifingte QR Indýstriia jáne infraqurylymdyq damý ministri Roman Skliar aitty, dep habarlaidy QazAqparat.
«Búginde bul baǵyttaǵy tiimdi jumysty baiqap otyrmyz. Mundai tájiribeni jalǵastyrý Jańa Jibek jolyn nyǵaityp, damyta túsýge qyzmet etetin bolady. Biz kólik-logistikalyq qýatty odan ary damytýǵa, kóliktik áleýetti tolyqqandy paidalanýǵa niettimiz. Bul ózara tiimdi taýar ainalymyn arttyrýǵa múmkindik beredi. Buǵan qosa, Memleket basshysynyń sapary aiasynda jylyna 2 mln tonnaǵa jýyq Qazaqstan kómirin Qytaidyń Lianiýngan porty arqyly Ońtústik Shyǵys Aziia elderine tasymaldaý týraly aldyn ala ýaǵdalastyqqa qol jetkizildi.Sonymen qatar Prezidenttiń sapary aiasynda aviatsiialyq izdeý jáne azamattyq kemelerdi qutqarý salasyndaǵy yntymaqtastyq týraly óte mańyzdy úkimetaralyq kelisimge qol qoiyldy», - dedi ol QR Prezidenti Qasym-Jomart Toqaevtyń Qytaiǵa saparyna orai.
Sonymen qatar ministr Qazaqstan men Qytaidyń terminaldardy jáne kóliktik infraqurylymdardy birlesip paidalanýdyń áleýeti zor ekendigin basa aitty. Bul baǵyttaǵy eki eldiń yntymaqtastyǵy konteinerlik tasymaldyń arta túsýine septigin tigizedi.
«Nurly jol» baǵdarlamasyn «Bir jol - bir beldeý» bastamasymen túiindestirý josparyn júzege asyrý aiasynda 4 jyldyń ishinde Qytai-Eýropa-Qytai baǵdaryndaǵy konteinerlik tasymal kólemi 15 ese ósti. Bul baǵytta 2014 jyly konteinerlik júk tasymalynyń kólemi 21 myń bolsa, ótken jyldyń qorytyndysynda 310 myń konteinerge jetti. Jyl saiynǵy ósim 50 paiyzdan asyp túsedi«, - dedi Roman Skliar.
