Búgin Túrkistan qalasyndaǵy «Olympic center» sport saraiynda alǵash ret qazaq kúresinen «Turan Barysy» Aziia Kýbogy óz máresine jetti.
Jarysqa Túrki memleketteri uiymynyń músheleri – Túrkiia, Ózbekstan, Ázerbaijan, Qyrǵyzstan, Majarstan jáne Qazaqstan balýandary qatysyp, ózara myqtylaryn anyqtady. Saiystyń ashylý saltanatynda Túrkistan oblysynyń ákimi Darhan Satybaldy qatysýshylardy quttyqtady.
Dúbirli synda balýandar eki topqa bólinip, ainalmaly júiede kúresti. Eki toptan iriktelgen Ázerbaijan, Qyrǵyzstan, Ózbekstan, Qazaqstan qurama komandalary júldeli oryndarǵa talasty.
Ázirbaijan eliniń balýandaryn qapy qaldyrǵan qyrǵyz órenderi qola júldeni ielendi. Al tartysqa toly kúres básekesiniń aqtyq aiqasy Qazaqstan quramasymen Ózbekstan eliniń balýandary arasynda ótti. Aitýly dodanyń aqtyq básekesinde 4:3 esebimen Qazaqstan balýandary jeńiske jetip, Turan Barysy» dodasynyń jeńimpazy atandy.
Alǵash ret uiymdastyrylǵan kúres saiysynda birinshi oryn alǵan komanda 10 000 000 teńge kóleminde qarjylai syilyq alsa, ekinshi orynǵa – 6 000 000, úshinshi orynǵa – 4 000 000 teńge qarjylai syilyq tabystaldy.
Esterińizge sala ketsek, is-shara QR Mádeniet jáne sport ministrligi men Túrkistan oblysy ákimdiginiń, sondai-aq, «Qazaq kuresi» assotsiatsiiasy, «Qazaqstan Barysy» qazaq kúresin qoldaý jáne damytý qorynyń uiymdastyrýymen ótti. Týrnirdiń bas seriktesteri – «Samuryq-Qazyna» UÁQ AQ jáne «Týrizm men sportty qoldaý jáne damytý qory».
Týrnirdi «Qazsport» jáne «TRT Avaz» telearnalary tikelei efirde kórsetti.
