Qazaqstan shahmat federatsiiasy Dúniejúzilik shahmat olimpiadasynyń ashylý saltanatynda ulttyq quramada memlekettik týdyń bolmaýyn túsindirdi, - dep habarlaidy Tengrinews.kz.
Federatsiia keiingi olimpiadalarda sportshylar sherýi bolmaǵanyn aitty. Tý, ádette, qatysýshylardy marapattaý kezinde olimpiadanyń jabylýynda ǵana qajet bolǵan.
"Biyl uiymdastyrýshylar osyndai múmkindik berýdi uiǵarǵan, biraq delegatsiiany habardar etpedi. Tek qazaqstandyq delegatsiia ǵana memlekettik rámizdersiz shyqqan joq. Ózge el ókilderiniń jartysynan kóbi eskertýsiz shyqty, al keibireýleri sherýge múldem qatyspady. Ashylý saltanatynda Qazaqstan atynan halyqaralyq grossmeister Jansaia Ábdimálik pen halyqaralyq sheber Arystanbek Orazaev shyqty", - dep túsindirdi federatsiia ókilderi.
44-dúniejúzilik shahmat olimpiadasynda Qazaqstan namysyn erler men áielder quramasy qorǵaidy. Erler quramasynda Rinat Jumataev, Murtas Qajǵaleev, Arystanbek Orazaev, Qazybek Nógerbek, Álisher Súleimanov bar. Áielder quramasynda Ábdimálik Jansaia, Asaýbaeva Bibisara, Nahbaeva Gúlishan, Balabaev Kseniia jáne Nurǵali Nazerke bar.
Buǵan deiin Bibisara Asaýbaevanyń anasy Liana Tańjaryqova Qazaqstan shahmat federatsiiasynyń "týǵa aqsha aiaǵanyn" málimdegen bolatyn. Onyń aitýynsha, osynyń nátijesinde ulttyq qurama Búkilálemdik shahmat olimpiadasynyń ashylý sherýinde týsyz ótken.
"Ulttyq quramanyń olimpiadaǵa qatysýyn uiymdastyrýǵa jaýapty Qazaqstandyq shahmat federatsiiasy aldyn ala daiyndalmady, qajet dep sanamai, umytyp ketti, 20 myń teńgeni aiady, Dúniejúzilik Olimpiada oiyndaryna qazaqstandyq týdy qasaqana almady. Qazaqstan quramasy sherýde týsyz ótti. Uiat, masqara", - dep jazdy ol áleýmettik jelilerde.
