Qazaqstan Ulttyq banki tótenshe jaǵdai bastalǵan sátten bastap ishki naryqtaǵy ahýaldy jiti baqylaýynda ustap otyr, dep habarlaidy QazAqparat.
Bank ótimdiligin qoldaý úshin Ulttyq bank standartty quraldarǵa qosymsha Qazaqstan qor birjasynda (KASE) repo operatsiialary arqyly ótimdilikti 3 aiǵa deiingi merzimge qoldaý tetigin paidalana bastady.
Ekinshi deńgeili bankterdiń barlyq qajettilikteri tolyq kólemde qanaǵattandyrylyp otyr.
Almaty qalasy men basqa da óńirlerdegi ahýal turaqtalyp, bailanys tetikteri ret-retimen qalpyna kelýine bailanysty 2022 jylǵy 12 qańtardan bastap Qazaqstan qor birjasynyń valiýta alańynda saýda-sattyq, ekinshi deńgeili bankterdiń jáne banktik emes aiyrbastaý pýnktteriniń valiýtalyq aiyrbastaý operatsiialary, sondai-aq halyqaralyq tólemder men aýdarymdar qaita jandanady.
Oryn alǵan keleńsiz oqiǵalar kezinde qarjylyq turaqtylyqqa qoldaý kórsetý maqsatynda Memleket basshysynyń tapsyrmasyna sáikes, Ulttyq bank qajettilikke qarai óziniń tikelei qatysýymen jaǵdai tolyq turaqtalǵansha valiýtalyq interventsiialar júrgizý jáne naryqtyń ishki, syrtqy qatysýshylary tarapynan teńgege degen senimdi qalpyna keltirý arqyly valiýta naryǵynyń teńgerimdiligin qamtamasyz etedi.
