Hokkeiden Ýniversiada oiyndaryna qatysyp jatqan Qazaqstannyń erler quramasy finalǵa shyqty. Otandastarymyz jartylai finalda cheh eliniń hokkeishilerinen ailasyn asyrdy.
Qazaqstan men Chehiia quramalary toptyq kezeńde de oinaǵan bolatyn. Ol oiynda otandastarymyz qarsylastaryn 8:0 esebimen utqan edi. Búgin Sergei Staryginniń shákirtteri qarsylastaryn 4:1 esebimen utty.
Birinshi kezeńde cheh hokkeishileri shiraq oinady. 17 minýtta birinshi bolyp shaiba soǵyp, alǵa shyqty. Al Qazaqstan hokkeishileri Ýniversiada oiyndaryndaǵy alǵashqy shaibasyn qaqpalaryna kirgizip aldy. Degenmen araǵa birer minýt sala otandastarymyz tarazy basyn teńestirdi. Daniel Arnost soqqan shaibaǵa Konstantin Savenkov jaýap qatty.
Ekinshi kezeń basynda da Chehiia hokkeishileri jinaqy oinady. Sáti túskende shabýyldaýmen boldy. 30 minýtta Dmitrii Grentts shaiba soǵyp, Qazaqstandy alǵa shyǵardy. Jankúierler qoldaýymen jelpine túsken qazaqstandyq hokkeishiler araǵa birer minýt sala qarsylastar qaqpasyna úshinshi shaibany toǵytty. Bul joly Pavel Akoljinniń alystan baǵyttaǵan shaibasy qaqpa ishinen tabyldy.
Úshinshi kezeńde Qazaqstan quramasy tolyq basymdyǵyn tanytty. 42 minýtta Aleksei Antitseferov tórtinshi shaiba avtory atanyp, Qazaqstanǵa aiqyn jeńis syilady.
Finalda Qazaqstan hokkeishileri Reseimen kezdesedi. Olar búgin jartylai finalda Kanada hokkeishilerin 4:1 esebimen utqan bolatyn.
