Qazaqstanda halyq sany 2019 jylǵy 1 maýsymda 18 mln 489,7 myń adamdy qurady. Byltyrǵy 1 maýsymmen salystyrǵanda halyq sany 236,4 myń adamǵa nemese 1,3% ósken, dep habarlaidy "Ult aqparat" QR Ulttyq ekonomika ministrliginiń Statistika komitetine silteme jasap.
Esepti kezeńde qala turǵyndarynyń jalpy sany 10 mln 767,6 myń adamǵa jetken. Qalalyqtar Qazaqstan halqynyń 58,2%-yn quraidy. Aýyldarda jalpy 7 mln 722,1 myń adam, iaǵni respýblika halqynyń 41,8%-y turady.
Biylǵy qańtar-mamyr ailarynda respýblikada 1 jasqa deiingi 1 459 sábi shetinegen (byltyrǵy kórsetkish 1 366). Al náreste kezinde shetineý koeffitsienti ár 1000 nárestege 9,04-ten týra kelgen.
Nárestelerdiń shetineýiniń basty sebebi júktilik kezindegi aýrý-syrqaý bolyp otyr. Sonyń saldarynan biylǵy bes aida 772 náreste kóz jumǵan.
Biylǵy qańtar-mamyr ailarynda Qazaqstanǵa kelýshilerdiń sany 10,8%-ǵa qysqaryp, ketkender sany 19,8% ósken.
El ishindegi kóship-qonýshylar sany 19% ósken. Óńiraralyq kóshi-qonnyń oń saldosy Mańǵystaý oblysynda (515 adam) jáne Shymkent (4 144), Nur-Sultan (10 936) jáne Almaty (11 540) qalalarynda baiqalyp otyr.
