Ulttyq statistika biýrosy Qazaqstandaǵy halyq sany týraly naqtylanǵan málimetterdi usyndy, - dep habarlaidy "Ult aqparat".
Biýro málimetinshe, 2022 jylǵy 1 qarashadaǵy jaǵdai boiynsha el halqynyń sany 19,7152 million adamǵa jetti, onyń ishinde qalalyqtar - 12,1691 million (61,7 paiyz), aýyldyqtar - 7,5461 million (38,3 paiyz) adam.
Jyl basymen salystyrǵanda halyq sany 212 myń adamǵa nemese 1,1 paiyzǵa ósken.
2022 jylǵy qańtar-qazanda respýblika halqynyń tabiǵi ósimi ótken jyldyń qańtar-qazanymen salystyrǵanda (222,3 myń adam) 0,6 paiyzǵa tómendep, 221 myń adamdy quraǵan. 1000 adamǵa shaqqandaǵy tabiǵi ósimniń jalpy koeffitsienti - 13,51 adam.
AHAT organdary usynǵan azamattyq hal aktileri jazbalarynda qamtylǵan málimetterdi óńdeý nátijesinde 2022 jylǵy qańtar-qazanda týǵandar sany - 333,1 myń adam, bul - 2021 jyldyń sáikes kezeńimen salystyrǵanda (375,9 myń) 11,4 paiyzǵa az.
Qaralyp otyrǵan kezeńde qaitys bolǵandar sany - 112,1 myń adam, bul - 2021 jylǵy qańtar-qazanmen salystyrǵanda (153,6 myń adam) 27 paiyzǵa az. Jalpy, ólim kórsetkishi 1000 adamǵa shaqqanda 6,86 ólimdi quraǵan.
2022 jyldyń qańtar-qazanynda respýblikada 1 jasqa deiingi 2684 shetinegen náreste tirkelse, 2021 jyldyń sáikes kezeńimen salystyrǵanda (3020 shetinegen náreste) sany 11,1 paiyzǵa azaidy.
Al, kóshi-qon qyzmeti usynǵan aqparatty óńdeý nátijesinde 2022 jylǵy qańtar-qazanda respýblikaǵa kelgender sany - 12 926 adam. Elden ketkender sany - 21 875 adam.
TMD elderinen kelgender úlesi - 85 paiyz, ketkender - 84,4 paiyz.
El ishinde qonys aýdarǵandar sany 3,2 paiyzǵa ósken. Óńiraralyq qozǵalystar boiynsha respýblikanyń úsh oblysynda: Almatyda (30 388 adam), Astanada (29 086 adam) jáne Shymkentte (2 311 adam) halyqtyń kóshi-qonynyń oń saldosy qalyptasty.
