Qazaqstanda 1 shilde kúngi jaǵdai boiynsha halyq sany 18 million 507,9 myń adamǵa jetti, dep habarlaidy "Ult aqparat".
2018 jyldyń 1 shildesinen beri qazaqstandyqtardyń qatary 235,5 myń adamǵa (1,3%) kóbeidi.
Statistika komitetiniń málimetine sáikes, qala halqynyń sany 10 million 816,6 myń adam boldy. Bul – barlyq qazaqstandyqtyń 58,2 protsenti. Qalǵan 41,8 protsenti – 7 million 726,3 myń adam aýylda turady.
Biyl alty aidyń ishinde 1 jasqa deiin qaitys bolǵan balalardyń sany 1 702 adam boldy. Byltyr týra osy kezeńde 1 626 bala kóz jumǵan. Osylaisha, bala ólimi 4,7 protsentke artyp otyr. Negizgi sebepteri – perinataldyq kezeńdegi jaǵdailar (881 bala), týa bitken aýytqýlar (337 bala), tynys alý músheleriniń aýrýlary (131 bala), sondai-aq, ýlaný, jaraqat alý men jazataiym oqiǵalar (60 bala).
Kóshi-qon salasynda Qazaqstanǵa keletinderge qaraǵanda, ketetinder kóp bolyp tur. Kelgen adamdardyń sany 11,3 protsentke azaisa, ketip qalǵandar, kersinshe, 16,9 protsentke artty. Osy azamattardyń basym bóligi TMD aýmaǵynda kóship júredi. Al Qazaqstannyń ishki kóshi-qony 22,7 protsentke kóbeidi.
