Álemniń túrli elderindegi kórermen qaýym, onyń ishinde Braziliia, Argentina, Boliviia, Venesýela, Kolýmbiia, Paragvai, Perý, Ýrýgvai, Chili, Ekvador, sondai-aq Resei, Polsha, Belgiia, Singapýr, Shvetsiia men Avstraliiada mekendeitin otandastarymyz Qazaqstan halqynyń birligi merekesi aiasynda «Astana Opera» teatrynyń ekskliýzivti spektaklderin tamashalai alady.
Bul týraly teatrdyń baspasóz qyzmeti habarlady.
Opera jáne balet spektaklderiniń onlain kórsetilimi elordalyq teatrdyń YouTube platformasynda kórsetiledi, sonymen qatar taratylymnyń ýaqyty men kúni týraly tolyq aqparatty álemniń 16 elindegi Qazaqstan Respýblikasy Elshiliginiń ókilderi taratyn bolady.
- Adamdardy mádeniet siiaqty eshnárse toptastyryp, biriktire almaidy, sondyqtan biz Qazaqstan halqynyń birligi kúni álemniń ár buryshynda spektaklderimizdiń onlain kórsetilim jobasyn júzege asyrý týraly sheshim qabyldadyq. Oǵan 16 el qatysady, alǵashqylardyń biri bolyp Qazaqstan Respýblikasynyń Resei, Braziliia, Polsha men Shvetsiiadaǵy Elshilikteri kelisim bildirdi. Onlain-afishaǵa 5 spektakl endi – 28 sáýir kúni ótetin A.Adannyń «Korsar» baleti, kelesi kúni jurtshylyq nazaryna P.I.Chaikovskiidiń «Aqqý kóli» tanymal baleti usynylmaq, opera ónerin súier qaýym úshin 30 sáýirge Dj. Pýchchinidiń «Týrandot» spektaklin ázirledik. Al 1 jáne 2 mamyr kúnderi halyqaralyq aýditoriiamyzdy álemdik horeografiia jaýharlary – L.Minkýstyń «Don Kihot» jáne A.Adannyń «Korsar» baletterimen qýantpaqpyz, - dedi Qazaqstannyń eńbek sińirgen qairatkeri, «Astana Opera» teatrynyń direktory Ǵalym Ahmediarov.
- Elimizdiń barlyq turǵyndaryn tamasha, jarqyn ári izgi mereke – Qazaqstan halqynyń birligi kúnimen shyn júrekten quttyqtaimyn. Osy kúni árbir otbasyna myqty densaýlyq, amandyq, beibitshilik pen gúldený tilegim keledi. Qazaqstan – shamamen 125 ult pen ulys meken etken kópultty memleket. El táýelsizdiginiń 30 jyly ishinde qazaqstandyqtardyń beibitshilik pen kelisimde turyp jatqandyǵy qýantady. Barshamyzdyń mýzykaǵa degen mahabbatymyz birligimizdi arttyra bersin, - dep sózin qorytyndylady teatr direktory.
Barlyq onlain kórsetilimder shyǵarylǵan kúni saǵat 00.00-den bastap kelesi kúni saǵat 9.00-ge deiin teatrdyń YouTube-arnasynda Qazaqstan elshilikteriniń resmi derekkózderindegi siltemeler boiynsha qoljetimdi bolady.
Onlain spektaklderden bólek, elorda turǵyndary men qonaqtaryna 1 mamyrda «Astana Operanyń» Kameralyq zaly sahnasynda ótetin «Mahabbat pen dostyq úni» merekelik kontserti usynylady.
Oǵan opera solisteri men orkestr ártisteri qatysady. Baǵdarlamaǵa qonaqjai qazaq jerinde, bir shańyraq astynda tatý-tátti ómir súrip kele jatqan ulystardyń romanstary, halyq ánderi, aspaptyq mýzykasy engen. Ulttyq mýzykalyq dástúrlerdiń san alýandyǵy kórermenderge merekelik kóńil-kúi syilaityny anyq.
Karantin kezinde teatrǵa kelý «Ashyq» qosymshasy arqyly júzege asyrylatyndyǵyn eske salamyz.
