«Qazaqstan halqyna» qorynyń esebinen omyrtqa bulshyqetiniń atrofiiasyna shaldyqqan 4 balaǵa Qazaqstan aýmaǵynda tirkelmegen ZOLGENSMA preparatyn satyp alý úshin jalpy somasy 3,7 mlrd teńge tólengen.
Bul týraly qordyń resmi saity jazdy, dep habarlaidy QazAqparat.
«Qazaqstan halqyna» qorynyń qamqorshylyq keńesiniń kezekti otyrysynda jumsalǵan aqshanyń esebi qaralǵan.
25 naýryzdaǵy jaǵdai boiynsha qordan qańtar oqiǵasynda zardap shekkenderge jalpy somasy 495 million teńgege qaiyrymdylyq kómek kórsetilgen. Onyń ishinde:
- qaza tapqan áskeri qyzmetkerlerdiń, ishki ister jáne ulttyq qaýipsizdik organdary qyzmetkerleriniń otbasylaryna – 133 mln teńge;
- aýyr jaraqat alǵan áskeri qyzmetkerlerge, ishki ister jáne ulttyq qaýipsizdik organdarynyń qyzmetkerlerine – 318 mln teńge;
- qańtar oqiǵasynyń kezdeisoq qurbany bolǵan Qazaqstan Respýblikasy azamattarynyń otbasylaryna – 35 mln teńge;
- qańtar oqiǵasy kezinde zardap shekken balalardyń otbasylaryna – 9 mln.
«Bul baǵyttaǵy jumystar áli de jalǵasýda, azamattardyń óliminiń mán-jaiyn quzyrly organdar anyqtap jatyr», -dep jazylǵan málimette.
Sondai-aq, omyrtqa bulshyqetiniń atrofiiasyna shaldyqqan 4 balaǵa Qazaqstan Respýblikasynda tirkelmegen Onasemnogene Abeparvovec (ZOLGENSMA) preparatyn satyp alý úshin jalpy somasy 3,7 mlrd teńge tólengen.
«Naýqastar aýrýhanaǵa jatqyzyldy.Ár naýqasqa dárilik zatty jeke óndirý úshin biomaterialdar alyndy. Birinshi balaǵa preparat 26 naýryzda engizildi, qalǵandaryn 8 sáýirge deiin engizý josparlanýda», - dep jazylǵan qordyń saityndaǵy aqparatta.
