Elordada Qazaqstan halqy Assambleiasynyń QR Prezidenti Qasym-Jomart Toqaevtyń «Halyq birligi jáne júieli reformalar - el órkendeýiniń berik negizi» atty Joldaýyn talqylaýǵa arnalǵan dóńgelek ústel ótti., dep habarlaidy QazAqparat.
Sharaǵa Assambleia tóraǵasynyń orynbasary –Hatshylyq meńgerýshisi Marat Ázilhanov, QR Aqparat jáne áleýmettik damý vitse-ministri Serik Egizbaev, Assambleiadan sailanǵan Parlament Májilisiniń depýtattary, respýblikalyq jáne oblystyq etnomádeni birlestikter tóraǵalary, Assambleianyń qoǵamdyq qurylymdarynyń ókilderi, «Jańǵyrý joly» QHA respýblikalyq jastar qozǵalysynyń músheleri qatysty.
«Búgin biz Memleket basshysynyń «Halyq birligi jáne júieli reformalar - el órkendeýiniń berik negizi» atty Qazaqstan halqyna Joldaýyn talqylaý úshin dóńgelek ústel ótkizip jatyrmyz. Bul dóńgelek ústelge Májilis depýttary men memlekettik organ ókilderinen bólek, mádeni birlekstikterdiń basshylary men ǵylymii sarapshylar shaqyryldy. Jastar da bar. Óńirlerdiń bári onlain rejimde qosylyp jatyr. Basty maqsat – Joldaýdyń negizgi basymdyqtary men qaǵidattaryn talqylaý. Onyń ishinde, álbette, beibitshilik pen kelisim saiasaty, halyq birligi, ultaralyq kelisim máselelerin talqylaý kózdelip otyr. Bul máselege Memleket basshysy Joldaýynda úlken taraý arnap, kóp máseleler kóterdi. Onyń ishinde jas býyndy tárbieleý, memlekettik tildi damytý, ortaq qundylyqtardy dáripteý máseleleri qozǵaldy. Bizdiń Assambleia músheleri, búkil etnomádeni birlestikterdiń ókilderi, basshylary osy jumysqa atsalysyp, sol qundylyqtarymyzdy ári qarai dáriptep, qoǵamǵa engizýge atsalysa beredi», - dedi Marat Ázilhanov shara aldynda BAQ ókilderine bergen suhbatynda.
Jiyn qorytyndysy boiynsha, Qazaqstan halqy Assambleiasynyń músheleri men barlyq qurylymdary Prezident Joldaýyn túsindirý jáne iske asyrý jónindegi jumysqa qatysý úshin naqty sharalar ázirleitin bolyp tarqasty.
