QR Tuńǵysh Prezidenti Nursultan Nazarbaevtyń atyna Qazaqstan kenshilerinen ujymdyq hat kelip tústi, dep habarlaidy "Ult aqparat".
Elbasynyń resmi saityndaǵy aqparatqa súiensek, kenshiler óz hatynda kásibi merekemen quttyqtaǵany jáne taý-ken salasyn damytýǵa erekshe kóńil bólgeni úshin N.Nazarbaevqa alǵys bildirgen.
«Asa qadirli Elbasy! Kásibi merekemizben quttyqtaǵan jyly lebizińiz úshin shyn júrekten alǵys bildiremiz. Sizdiń egemen elimizdiń taý-ken salasyn damytýǵa árqashan erekshe kóńil bóletinińiz qýantady. Qazaqstannyń barlyq kenshileri halyqtyń ál-aýqatyn arttyrýǵa jáne ómir súrý sapasyn jaqsartýǵa baǵyttalǵan igi bastamalaryńyzdy tolyq qoldaidy. Biz, eńbek adamdary, árqashan Kóshbasshymyz – Siz úshin jáne Otanymyz – Qazaqstan úshin qorǵan bolamyz. Biz Sizdiń saliqaly basshylyǵyńyzdyń arqasynda elimizdiń táýelsizdik jyldary qol jetkizgen jetistikterin baǵalaimyz», - delingen hatta.
Sondai-aq kenshiler Qazaqstanda barlyq jaǵdai jasalǵanyn aitqan. Máselen, sapaly joldardyń bolýy, jastar úshin turǵyn úilerdiń salynýy, olardyń elimizdiń jáne dúniejúziniń eń úzdik oqý oryndarynda bilim alý múmkindigi, meditsinanyń damýy atap ótilgen. Eń bastysy, adamdarǵa jumys isteýge jáne tabys tabýǵa múmkindik mol.
«Qiyn-qystaý kezeńderge qaramastan, biz árqashanda Sizge jáne elimizge adal boldyq. Dál Sizdiń, Nursultan Ábishuly, Qazaqstandy ǵalamat biikterge jeteleitinińizge kámil sendik. Búgin Sizdiń ólsheýsiz eńbegińizge sheksiz rizamyz.Siz bizdiń Kóshbasshymyz, bizdiń – Elbasymyzsyz! Týǵan jerimizdegi beibit aspan men turaqtylyqtyń igiligi úshin biz árdaiym Sizdiń artyńyzdan ere beretin bolamyz!», - delingen jedelhatta.
