QR Bilim jáne ǵylym ministrligi Ázerbaijan azamattaryna jyl saiyn 10 bilim grantyn usynady, dep habarlaidy "Ult aqparat".
«Qazaqstan Bilim jáne ǵylym ministrligi men Ázerbaijan Bilim ministrligi arasyndaǵy 2017 jyldyń 3 sáýirindegi kelisimge sáikes 5 bakalavriat jáne 5 magistratýra grantyn usynady. Iaǵni, eki el bir-birine 10 granttan beredi», - dedi ministrliktiń baspasóz qyzmetinen QazAqparat tilshisine.
Aita keterligi, Ázerbaijannyń trend.az aqparat agenttigi Qazaqstannyń Bilim jáne ǵylym ministrligi Ázerbaijan azamattary úshin 2020-2021 oqý jylyna bakalavirat pen magistratýra boiynsha stipendiialyq baǵdarlamasyn jariialaǵandyǵyn, bilim berý qazaq, orys jáne aǵylshyn tilderinde júrgiziletindigin jariialaǵan bolatyn.
Jalpy, elimizdiń Bilim ministrliginiń málimetinshe, mundai kelisim Qazaqstan men Qytai, Majarstan, Qyrǵyzstan, Belarýs syndy taǵy 12 eldiń arasynda bar. Kelisimge sáikes taraptar bir-birine birdei bilim granttaryn usynady. Munan bólek, Abai-Vern baǵdarlamasy aiasynda Frantsiia Qazaqstan úshin birjaqty 100 grant (90 magistratýra, 10 doktorantýra) bóledi. Al Qazaqstan birjaqty 30 grantty Aýǵanstan jastaryna beredi.
