Qazaqstan qaýipsiz elder reitinginde TMD elderi arasynda birinshi jáne álemde 64-oryn aldy, dep habarlaidy Ranking.kz saity.
Dúniejúzilik banktiń baǵalaýynsha, 2019 jyly álemdik ekonomika 2,4% deiin baiaýlaǵan, onyń basty sebepteri – elder arasyndaǵy saýda soǵystary, álemdegi geosaiasi jaǵdai bolyp otyr.
Sonymen birge, syrtqy saiasi shielenis elderdiń investitsiialyq belsendiligine aitarlyqtai áser etti. 2019 jyly tikelei sheteldik investitsiialardyń jahandyq aǵyny tómendegen. EYDU málimetteri boiynsha, 2019 jyldyń alǵashqy jartysynda tikelei sheteldik investitsiialardyń ǵalamdyq aǵyny 20% nemese 572 mlrd dollarǵa deiin azaiǵan.
Memlekettegi beibit ahýal jáne basqa eldermen qarym-qatynas ekonomikanyń jáne tutastai eldiń damýynda mańyzdy ról atqarady. Álemdik beibitshilik indeksine sáikes, Islandiia, Jańa Zelandiia, Portýgaliia, Avstriia jáne Daniia ómir súrýge eń qaýipsiz elder atandy. Sonymen qatar, alǵashqy ondyqqa Kanada, Singapýr, Sloveniia, Japoniia jáne Chehiia kiredi. Jalpy, reitingke 163 el engen.
Indeks eldegi zorlyq-zombylyq deńgeii men qylmys syndy ishki faktorlardy jáne halyqaralyq qatynastary, áskeri shyǵyndar sekildi syrtqy faktorlardy eskeredi. Jalpy, ómir súrý qaýipsizdigi deńgeii 23 indikator boiynsha baǵalanady.
Ómir súrý úshin eń qaýipti elder qataryna Aýǵanstan, Siriia, Ońtústik Sýdan, Iemen jáne Irak enip otyr. Aita ketken jón, Resei eń qaýipti on eldiń qataryna kiredi.
Qazaqstan qaýipsizdik deńgeii joǵary elder tizimine enip, bul reitingte 64-shi orynǵa turaqtady. Sonymen birge, Qazaqstan zertteý júrgizýde TMD-ǵa kiretin nemese buryn bolǵan 12 memleket arasynda birinshi orynǵa ie boldy. Mundai baǵalaý, kóptegen basqa faktorlarmen qatar, eldi investorlar úshin tartymdy etedi jáne aimaqtaǵy básekege qabilettilikti arttyrady.
