Qazaqstan ishki naryqtyń tek 8 paiyzyn ǵana qantpen qamtyp otyr. Mundai derekti «Atameken» UKP Agroónerkásiptik keshen jáne tamaq ónerkásibi departamentiniń direktory Erbol Eseneev keltirdi, dep habarlaidy QazAqparat.
«Qazirgi ýaqytta elimiz 12,3 gektar aýmaqqa qant qyzylshasyn egedi. Ol eldiń tek 8 paiyzyn ǵana qantpen qamtýǵa jetedi. Búginde ár gektardan 40 myń tonna qant alyp otyrymyz. Eger sýarmaly qant qyzylshasy alqabyn 104 myń gektarǵa ulǵaitsa, onda ishki naryqtyń 80 paiyzyn tolyq qantpen qamtý múmkindigi bar», - dep atap ótti Erbol Eseneev.
Al, «Atameken» UKP Agroónerkásip kesheni komitetiniń tóraǵasy Jigýli Dairabaev bolsa, Almaty men Jambyldaǵy qant zaýyttary tolyq qýatynda jumys istep turmaǵanyn aitty.
«Bizde respýblika boiynsha qant óndiretin Almaty men Jambyldaǵy zaýyttar. Olardyń ózderi tolyq qýattylyqpen jumys istep turǵan joq. 12 aidyń ishinde 2-3 ai jumys isteidi de, turady. Ol jerde qanshama jumys kúshi bar. Olardyń januialary bar. Eger dúken sórelerindegi qanttyń baǵasy arzan bolsyn desek, biz oǵan durys kóńil bólýimiz kerek. Bizde óndiretin ónim jetpeidi. Qant qyzylshasynyń egis alqabyn kóbeitý qajet. Osyǵan bailanysty azamattar da jumyspen qamtylady. Ózimizdiń otandyq tuqymdardy egý qajet. Biz shetelden tuqym alamyz, jeńil-jelpi dúnie jasaimyz degen – bos sóz», - dedi Jigýli Dairabaev.
Budan bólek, keshegi Úkimettiń keńeitilgen otyrysynda Prezident júktegen tapsyrmalardy talqylaý barysynda «Atameken» UKP sarapshylary fermerlerge jeńildikpen nesie berý máselesin kóterdi. Elimizde 300 myńnan astam fermer bar. Sarapshylardyń aitýynsha, olarǵa qajetti jaǵdai jasalyp jatqan joq. Sondyqtan, «Atameken» UKP ókilderi sharýashylyqtarǵa kásibiniń kólemine bailanysty nesie berý qajet ekenin atap ótti.
Eske salsaq, Úkimettiń keńeitilgen otyrysynda Memleket basshysy Qasym-Jomart Toqaev qant tapshylyǵyn rettei almaǵan Saýda jáne integratsiia ministri Baqyt Sultanov pen Aýyl sharýashylyǵy ministri Erbol Qarashókeevke sógis jariialady.
